काठमाडौं । विश्वकै सबैभन्दा अग्लो व्यक्ति टर्कीका ४१ वर्षीय सुल्तान कोसेनले मंगलबार भारतकी ३० वर्षीया महिला ज्योति अमागेसँग भेट गरेका छन् । सुल्तानको उचाइ ८ फिट २.८ इन्च छ । ज्योति २ फिट ७ इन्च अग्ली छिन् ।

दुवैको यो दोस्रो भेट क्यालिफोर्नियामा भएको थियो । यसअघि दुवै सन् २०१८ मा सँगै देखिएका थिए । मंगलबारको भेटपछि दुवैले फोटो सेसनमा भाग लिएका थिए । दुवैको नाम गिनिज बुक अफ वर्ल्ड रेकर्डमा लेखिएको छ ।

‘द इन्डिपेन्डेन्ट’को रिपोर्टका अनुसार सन् २००९ मा सुल्तानको नाम विश्वकै सबैभन्दा अग्लो व्यक्तिको रुपमा गिनिज बुक अफ वल्र्ड रेकर्डमा दर्ता भएको थियो । त्यसयता उनको उचाइ २ इन्चले बढेको छ ।

सुल्तान पेसाले किसान हुन् । उनी टर्कीश बाहेक अन्य भाषा बोल्न सक्दैनन्। त्यसकारण, उनलाई संसारलाई आफ्नो सन्देश सुनाउन अनुवादक चाहिन्छ।

अर्कोतर्फ ज्योति हिन्दी, मराठी र केही हदसम्म अंग्रेजी बोल्न सक्छिन् । सुल्तान र ज्योतिले क्यालिफोर्नियामा सँगै ब्रेकफास्ट गरेका थिए । त्यसपछि केहीबेर मिडियासामु पोज दिए । यसअघि दुवैले २०१८ मा इजिप्टमा भेटेका थिए । त्यतिबेला पनि उनीहरूले फोटोसुट गराएका थिए ।

चिकित्सा विज्ञानका अनुसार सुल्तानको उचाइलाई सामान्य भन्न मिल्दैन । चिकित्सकीय हिसाबले उनी एक्रोमेगालीबाट पीडित छन्। यो पिट्यूटरी ग्रन्थी मा एक ट्युमरको कारण हो।

यो ट्युमरले ग्रोथ हर्मोनलाई सामान्य रहन दिँदैन र यो सन्तुलनमा गडबड हुँदा गिगेन्टिज्म प्रक्रिया हुन्छ र जसका कारण उचाइ सामान्यभन्दा धेरै छिटो बढ्छ ।

२०११ मा, सुल्तान भर्जिनिया विश्वविद्यालयको मेडिकल सेन्टर पुगे। यहाँ उनको उपचार भयो र त्यसपछि उनको उचाइ बढ्न छाड्यो । सुल्तानको नाडी र बीचको औंलाको बीचमा ११.२२ इन्चको दुरी छ।

उनीसँग विश्वको सबैभन्दा ठूलो हत्केलाको कीर्तिमान पनि छ। यसबाहेक, उनको खुट्टाको पैताला पनि सबैभन्दा ठूलो छन्। पैतलाको लम्बाइ १ फिट २ इन्च छ । ज्योतिको उचाइ सुल्तानको उचाइको एक चौथाई हो।
ज्योतिको उचाइ लगभग सुल्तानको जुत्ता जत्तिकै छ। यो तस्बिरहरूमा देख्न सकिन्छ।

रिपोर्टका अनुसार ज्योति अमागे एक अभिनेत्री हुन् । उनको उचाइ २.७ फिट छ । चिकित्सकीय भाषामा भन्नुपर्दा ज्योतिलाई एकोन्ड्रोप्लासिया नामक रोग लागेको छ । यो उचाइको कमीसँग सम्बन्धित विशेष रोग हो।

ज्योतिले १६ डिसेम्बर २०११ मा आफ्नो १८ औं जन्मदिन मनाइन् र सोही दिन उनको नाम सबैभन्दा कम उचाइ भएकी महिलाको रुपमा गिनिज बुक अफ वर्ल्ड रेकर्डमा लेखिएको थियो ।

सन् २०१४ मा ज्योति अमेरिकी टिभी कार्यक्रममा पनि देखा परिन् । २०१८ मा, इजिप्ट टुरिजम प्रमोशन बोर्डले उनलाई सुल्तानसँगै एउटा कार्यक्रममा निम्तो दिएको थियो।