काठमाडौं । सन् २०२२ मा गायक सिद्धू मूसेवालाको निर्ममतापूर्वक हत्या भएको थियो । उनलाई फ्यानले आजसम्म बिर्सन सकेका छैनन् । तर अब गायकका फ्यानका लागि खुसीको खबर आएको छ । गायकका आमाबुवाले छिट्टै आफ्नो घरमा सानो पाहुनालाई स्वागत गर्न लागेका छन् ।

स्वर्गीय गायक सिद्धु मूसेवालाको घरमा छिट्टै बच्चाको हाँसो गुन्जिँदैछ । गायककी आमा चरण कौर गर्भवती छिन् । मूसेवालाका आमाबाबुले चाँडै आफ्नो घरमा सानो पाहुनालाई स्वागत गर्न लागेका छन्। सिद्धु मूसेवालाकी आमा आईभीएफको सहयोगमा गर्भवती भएकी छिन् र उनले मार्चमा बच्चालाई जन्म दिनेछिन् ।

सिद्धु मूसेवाला आफ्ना आमाबाबुका एक मात्र छोरा थिए। उनको मृत्युले परिवार गहिरो स्तब्ध भएको थियो। घरका चिरागको मृत्युको शोकबाट परिवार अझै बाहिर आउन सकेको छैन । यस्तो अवस्थामा गायकका बाबुआमा फेरि अभिभावक बनेको खबरले सबैलाई स्तब्ध बनाएको छ ।

सिद्धु मूसेवालाको कुरा गर्ने हो भने उनको जन्म १७ जुन १९९३ मा भएको थियो । गायकको वास्तविक नाम शुभदीप सिंह सिद्धु थियो तर मानिसहरूले उनलाई सिद्धु मूसेवाला भनेर चिन्छन्। उनले सानै उमेरमा आफ्नो बलियो पहिचान बनाएका थिए । उनले धेरै हिट गीत गाए तर उनी ग्याङस्टर र्याप गीतका लागि परिचित थिए ।

सिद्धु मूसेवालालाई पञ्जाबी संगीत उद्योगमा एक विवादित गायकको रूपमा पनि चिनिन्छ। उनीमाथि खुलेआम बन्दुक संस्कृतिलाई बढावा दिएको आरोप लागेको थियो । तर पनि फ्यानहरु उनको लागि पागल नै रहे। तर २९ मे २०२२ मा सिद्धु मूसेवालाले जीवनको युद्ध हारे। उनलाई केही गुण्डाहरुले गोली हानेर मारेका थिए ।