काठमाडौं । न्यून जन्मदरका कारण समस्याको सामना गरिरहेको देश दक्षिण कोरियाको एक कम्पनीले आफ्ना कर्मचारीलाई बच्चा जन्माउन प्रोत्साहित गर्न आकर्षक अफर ल्याएको छ ।

यहाँको निर्माण कम्पनी बुयोङ ग्रुपले आफ्ना कर्मचारीहरूलाई २०२१ पछि जन्मिने प्रत्येक बच्चाको लागि १०० मिलियन वोन (१ करोड रूपैयाँ) बोनस प्रदान गर्दैछ। कम्पनीका प्रमुख कार्यकारी अधिकृतले देशको न्यून जन्मदर बढाउन यो प्रयास गरिएको बताए ।

यसमा कर्मचारी र उनीहरूका नजिकका परिवारका सदस्यहरूको लागि चिकित्सा खर्च र उनीहरूका बच्चाहरूको लागि कलेज ट्युसनको भुक्तानी समावेश छ। बुयोङ समूहका अध्यक्ष ली जोङ-क्युनले सोमबार कम्पनीले २०२१ पछि जन्मिने प्रत्येक बच्चाका लागि कर्मचारीहरूलाई १० करोड वोन उपलब्ध गराउने बताए।

कोरिया टाइम्सका अनुसार यस वर्ष यो बोनसका लागि ७० कर्मचारी योग्य छन् । यी कर्मचारीलाई बोनस दिँदा कम्पनीको कुल लागत ७ अर्ब वन पर्नेछ । ८४ वर्षीय लीले कम्पनीले भविष्यमा पनि यो नीतिलाई निरन्तरता दिने बताए ।

द क्यूङग्याङ शिनमुनको रिपोर्ट अनुसार उनले थप भने: “सरकारले जग्गा उपलब्ध गराएमा हामी तीन सन्तान जन्माउने अधिकारी र कर्मचारीका परिवारलाई तीन सन्तानका प्रोत्साहन रकम वा स्थायी भाडाको घरमा छनोट गर्न दिनेछौं।”

वर्तमान दरमा जन्मदर घट्ने क्रम जारी रहेमा देशले २० वर्षमा राष्ट्रिय अस्तित्वको संकट सामना गर्ने लीले चेतावनी दिएका छन्। बाल पालनपोषणको आर्थिक बोझ र काम र पारिवारिक जीवनलाई सन्तुलनमा राख्न कठिनाइका कारण यहाँ जन्मदर घटिरहेको छ ।

दक्षिण कोरियामा २०२२ मा २ लाख ५० हजार नवजात शिशु मात्रै जन्मिएका थिए । तर यो योजना अन्तर्गत तीन वा सोभन्दा बढी बच्चा भएका कर्मचारीलाई स्थायी भाडाको घर पनि उपलब्ध गराइएको छ । लीले बच्चा जन्माउन प्रोत्साहन गर्न कर-मुक्त दान प्रणालीको सुझाव दिएका छन्।