काठमाडौं । भारतको हैदरावादस्थित इन्डियन इम्युनोलोजिकल लिमिटेड (आईआईएल) ले डेंगु रोकथामका लागि खोप तयार गरेको दाबी गरेको छ ।

आईआईएलका प्रबन्ध निर्देशक डा के आनन्द कुमारले सबै कुरा ठीक भएमा यो खोप सबै परीक्षणहरू पूरा भएपछि करिब दुई वर्षमा (२०२६ को मध्य) मानिसहरूलाई दिइने दाबी गरेका छन्।

यस खोपको पहिलो चरणको परीक्षण सकिएको र दोस्रो र तेस्रो चरणको परीक्षण चाँडै सुरु हुने डा कुमारले बताए ।

डेंगु बाहेक, आइआइएल हाल जिका भाइरस र क्यासनुर फरेस्ट डिजिज (केएफडी) विरुद्धको खोपको विकासमा पनि संलग्न छ।

भारतीय इम्युनोलोजिकल लिमिटेड (आइआइएल) केन्द्रीय मत्स्यपालन, पशुपालन र डेयरी मन्त्रालय अन्तर्गत राष्ट्रिय डेयरी विकास बोर्ड (एनडीडीबी) को पूर्ण स्वामित्वमा रहेको सहायक कम्पनी हो।

एक प्रतिवेदन अनुसार विश्वमा हरेक वर्ष १० करोड डेंगुका बिरामी भेटिन्छन् । भारतमा हरेक वर्ष लगभग ३.५ करोड केसहरू भेटिन्छन्।