काठमाडौं । रुसले मङ्गलबार ‘आतंकवादलाई आर्थिक सहयोग’ गरेको विषयमा अनुसन्धान थालेको छ जसमा पश्चिमी देशहरू पनि समावेश छन्। युक्रेनमा अमेरिकी कम्पनीहरूले दिएको रकम रुसमा ‘आतंकवादी गतिविधि’का लागि प्रयोग भएको बताइएको छ।

मस्कोले गत महिना एक कन्सर्ट हलमा भएको आक्रमणमा १४४ जनाको ज्यान लिएकोमा मस्कोले लगातार पश्चिमी देश र युक्रेनलाई दोषारोपण गरिरहेको बेला यो अनुसन्धान सुरु भएको हो ।

इस्लामिक स्टेटले गत महिना मस्कोको क्रोकस सिटी हलमा भएको आक्रमणको जिम्मेवारी लिएको छ । अमेरिकी अधिकारीहरूले मस्कोलाई आक्रमणबारे चेतावनी दिएको बताएका छन्।

मस्कोको अनुसन्धान समितिले लाखौं डलरको “आम्दानीको स्रोत” र “पश्चिमी देशका सरकारी अधिकारी र व्यावसायिक संस्थाका प्रमुख व्यक्तिहरूको संलग्नता” खोजिरहेको बताएको छ। यसमा अमेरिकी राष्ट्रपति जो बाइडेनका छोरा हन्टर बाइडेनले काम गर्ने कम्पनीको नाम पनि समावेश गरेको छ।

समितिले भन्यो, “हालैका वर्षहरूमा युक्रेनमा सञ्चालित तेल र ग्यास कम्पनी बुरिस्मा होल्डिङजस्ता व्यावसायिक संस्थाहरूबाट प्राप्त रकम रुसभित्र आतङ्ककारी गतिविधि सञ्चालन गर्न प्रयोग भइरहेको छ ।”

समितिले ‘आतंकवादका अपराधीहरुको विदेशी क्युरेटर, संगठन र प्रायोजकसँगको सम्बन्ध’ पत्ता लगाउन अनुसन्धान भइरहेको जनाएको छ । रिपब्लिकन पार्टीले बाइडेनलाई युक्रेनमा आफ्नो छोरालाई व्यापारिक सम्झौतामा सहयोग गर्न आफ्नो प्रभाव प्रयोग गरेको आरोप लगाउँदै आएका बेला रुसले यो कदम उठाएको हो ।