काठमाडौं । रुसले युक्रेनको राजधानी किभमा रहेको एउटा ठूलो पावर प्लान्टलाई पूर्ण रुपमा ध्वस्त पारेको छ । ट्रिपिल्या पावर प्लान्ट किभ सहित युक्रेनको तीन ठूला क्षेत्रहरूमा बिजुलीको सबैभन्दा ठूलो उत्पादक थियो।

ऊर्जा कम्पनी सेन्टरएनर्गोले विद्युत् केन्द्रमा क्षति पुगेको पुष्टि गरेको छ। “विनाशको मात्रा डरलाग्दो छ,” कम्पनीका अध्यक्ष एन्ड्रे होटाले भने।

रुसले लामो समयदेखि युक्रेनको ऊर्जा प्रणालीलाई जानाजानी र व्यवस्थित रूपमा निशाना बनाउँदै आएको छ।

होटाले बीबीसीलाई भने – “रुसी आक्रमणले बिहीबार बिहान ट्रान्सफर्मर, टर्बाइन, जेनेरेटर ध्वस्त पारेको छ। यी आक्रमणहरूले पावर प्लान्ट पूर्ण रूपमा ध्वस्त पारेको छ।”

बिहीबार बिहान ८० भन्दा बढी मिसाइल र ड्रोनले युक्रेनका विभिन्न क्षेत्रलाई निशाना बनाएका थिए । तीमध्ये धेरैजसो पावर प्लान्टहरू लक्षित छन्।

युक्रेनी राष्ट्रपति भोलोडिमिर जेलेन्स्कीले यी आक्रमणहरूमा ध्यानाकर्षण गर्दै, हवाई रक्षाको तत्काल आवश्यकताहरू पूरा गर्न पुन: अपील गरेका छन्।