काठमाडौं । इरानको आक्रमणको जवाफ दिँदै इजरायलले इरानलाई उचित समयमा ‘मूल्य चुक्ता गर्ने’ बताएको छ।

इजरायलका युद्ध क्याबिनेट मन्त्री बेन्नी गान्ट्जले मन्त्रिपरिषद् बैठक सुरु हुनु अघि भनेका छन् – हामी क्षेत्रीय स्तरमा गठबन्धन बनाउनेछौं र उपयुक्त समयमा इरानबाट यस आक्रमणको मूल्य चुक्ता गर्नेछौं ।

गान्ट्जले आफूले जर्मन विदेश मन्त्री एन्नालिना बारबकसँग कुरा गरेको र विश्वव्यापी स्तरमा एकताको बारेमा कुरा गरेको बताए ।

इजरायली सेनाले आइतवार भनेअनुसार इरानले इजरायलमा ३०० भन्दा बढी ड्रोन र मिसाइलहरू प्रहार गरेको छ।

अप्रिल १ मा, सिरियामा इरानको वाणिज्य दूतावासमा आक्रमण भएको थियो, जसमा धेरै रिभोलुसनरी गार्डका अधिकारीहरू मारिएका थिए। इरानले यसका लागि इजरायललाई जिम्मेवार ठहर गर्दै बदला लिने कुरा गरेको थियो।