काठमाडौं । पश्चिमी अस्ट्रेलियाको तटमा १६० भन्दा बढी ह्वेल फसेका छन् । स्थानीय अधिकारीहरुले सो जानकारी दिएका छन् । पश्चिमी अष्ट्रेलियाको पार्क र वन्यजन्तु प्राधिकरण डीबीसीएले पर्थबाट करिब २५० किलोमिटर दक्षिणमा रहेको डन्सबरो नजिकै ठूलो संख्यामा ह्वेलहरू दलदले पानीमा फसेको बताएको छ।

अष्ट्रेलियाको टिभी च्यानल एबीसीले डीबीसीएका प्रवक्तालाई उद्धृत गर्दै दिउँसो २६ वटा जनावर मरेको बताएको छ । रिपोर्टमा भनिएअनुसार स्वयंसेवकहरूले १४० भन्दा बढी ह्वेलहरूलाई जीवित राख्न प्रयास गरिरहेका छन्।

यसैबीच, आपतकालीन सेवाहरूले किनारमा फसेका लगभग २० ह्वेलहरूको अर्को समूहलाई उद्धार गर्न डुङ्गाहरू प्रयोग गरे। करिब ११० ह्वेलको अर्को समूह पनि तटबाट अलि पर गहिरो पानीमा भेटिएको थियो।

पशु अधिकारकर्मी र स्थानीय बासिन्दाहरू ह्वेलहरूलाई जीवित राख्न पानी हाल्न समुद्र तटमा पुगेका छन्। यद्यपि, स्थानीय अधिकारीहरूले जनतालाई विज्ञहरूको निर्देशनमा मात्र ह्वेलहरू नजिक पुग्न अपील गरेका छन्।

“हामीलाई थाहा छ मानिसहरू मद्दत गर्न चाहन्छन्, तर हामी मानिसहरूलाई डीबीसीए कर्मचारीको निर्देशन बिना जनावरहरूलाई बचाउने प्रयास नगर्न अनुरोध गर्दछौं किनभने यसले जनावरहरूलाई थप चोटपटक लाग्न सक्छ,” प्राधिकरणले एक विज्ञप्तिमा भन्यो।

घटनास्थलमा रहेका समुद्री विशेषज्ञ इयान विसेले रेडियो एबीसी पर्थलाई भने – धेरै ह्वेलहरू पहिले नै मरेका थिए। बाँकी संघर्षरत छन् र केही घण्टामा मर्न पनि सक्छन्। यो भयानक छ।