काठमाडौं । भारतीय जनता पार्टीका नेता तथा कर्नाटकका पूर्व मुख्यमन्त्री बीएस येदियुरप्पामाथि आफ्नी नाबालिग छोरीलाई यौन दुर्व्यवहार गरेको आरोप लगाएकी महिलाको बेंगलुरुको एक निजी अस्पतालमा मृत्यु भएको छ ।

५४ वर्षीया ममता सिंहलाई सास फेर्न गाह्रो भएपछि अस्पताल भर्ना गरिएको थियो ।

मार्च १४ मा ममता सिंहले आफू कर्नाटकका पूर्व मुख्यमन्त्री येदियुरप्पाकहाँ मद्दत माग्न गएको, त्यहाँ उनले कथित रूपमा उनकी (ममता सिंहकी) नाबालिग छोरीलाई यौन दुर्व्यवहार गरेको आरोप लगाएकी थिइन् ।

आरोप लगत्तै येदियुरप्पाले पनि आफूले ती महिलालाई भेटेको पुष्टि गरेका थिए ।

तर उनले भनेका थिए, ‘उनी (ममता सिंह) अगाडि उभिरहेकी थिइन् र रोइरहेकी थिइन् । मैले उनलाई पहिले पनि देखेको छु, तर भेटेको छैन। मैले उनलाई भेट्न बोलाएँ र कुरा गरें। मैले प्रहरी आयुक्तलाई पनि फोन गरें । तर अचानक उनले (ममता सिंह) ममाथि आरोप लगाउन थालिन् ।’

“मैले आशा गरेको थिइनँ कि कुनै सहयोग गर्दा तपाईमाथि आरोप लगाइन्छ। मैले उनलाई केही पैसा पनि दिएको थिएँ ।”

नानो अस्पतालका डा जीआर मोहनले भने, ‘हामीले अक्सिजन दिने सामान्य प्रक्रिया अपनायौं । तर भर्ना भएको करिब एक घण्टापछि उनको मृत्यु भयो ।’

डा मोहनले अस्पतालले एमएलसी दर्ता गर्न चाहेकोबारे परिवारलाई सोधेको बताएका छन् । तर परिवारले यो कुरा अस्वीकार गरे । ममता सिंह मिर्गौला र फोक्सोको क्यान्सरबाट पीडित थिइन् ।

ममता सिंहले फेब्रुअरी २, २०२४ मा बीएस येदियुरप्पालाई भेट्दा उनले उनकी नाबालिग छोरीलाई यौन दुर्व्यवहार गरेको आरोप लगाएकी थिइन्।

बीएस येदियुरप्पा विरुद्ध पोक्सोको धारा ८ र आइपीसी को धारा ३५४ अन्तर्गत मुद्दा दर्ता गरिएको छ। ममता सिंहले आज साँझ वकिल एस बालनलाई भेट्न समय लिएकी थिइन्।

एस बालनले बीबीसी हिन्दीलाई भने, “उनले (ममता सिंह) शनिबार अपोइन्टमेन्ट लिएकी थिइन्। उनले आफ्ना वकिलहरूले मुद्दालाई राम्ररी सम्हाल्न नसकेको बताएकी थिइन् । मैले उनलाई आज आउन आग्रह गरें । तर हामीले भर्खरै थाहा पायौं कि उनको मृत्यु भयो।”