पहिले मानिसको शरीर
उकालो ओरालो पाइला चालिन्थ्यो
पसीना पुछदै बरको छाँयामा
डोको जस्तो पुर्लुक्क ढालिन्थ्यो

फाटेको टोपी ढल्काए पनि
रातोपीरो अनुहार बालिन्थ्यो
गुन्द्रुक ढिँढोको स्वाद लिँदै
डेउडा ठाडी भाका हालिन्थ्यो

अहिले मानिसको शरीर
ख्वाइप्याइ मायाले पालिन्छ
टिभी खोलि सेलफोन चलाउदै
सोफामा फ्यात्त फालिन्छ

मोटर जहाजमा सररर सफर
टिकटक फेसबुकमा फोटो हालिन्छ
जंक फूड खाएर रोग लागेपछि
अप्रेशन गर्दै छाला टालिन्छ

पहिले मानिसको शरीर
सन्तोष, आनन्द, थिएन पीर
अहिले मानिसको शरीर
एक्लो, चिन्तित छैन स्थिर

लस एन्जेलस