काठमाडौं । ऋण लिने व्यक्ति पैसा नतिरी मरेपछि लाशसँगै पैसा असुल्ने प्रयास गरेको आरोपमा ताइवानमा एक महिला पक्राउ परेकी छिन् ।

उनलाई मृत शरीरको नजिक पुगेर सादा कागजमा लाशको औंठाछाप लिने प्रयास गर्दा पक्राउ गरिएको हो। उनले मृतक व्यक्तिले लिएको ऋणको लागि नक्कली जग्गा धितो कागजात बनाउन औंठाछाप प्रयोग गर्ने उद्देश्य राखेकी थिइन्।

साउथ चाइना मर्निङ पोस्टका अनुसार उत्तरपश्चिम ताइवानको सिन्चुमा रहेको अन्त्येष्टि स्थलमा लिन नामकी ५९ वर्षीया महिलालाई शवबाट औंठाछाप लिँदै गर्दा रंगेहात पक्राउ गरिएको समाचार आउटलेट एसइटीएनले जनाएको छ। मृतकको परिवारले उनको असामान्य व्यवहारका कारण प्रहरीलाई फोन गरेपछि यो घटना बाहिर आएको हो।

ली र पेङ नामका एक पुरुषबीच पहिले नै ऋणलाई लिएर विवाद भइसकेको थियो। फेब्रुअरी २१ मा पेङको मृत्यु भएको सुनेपछि उनी केही घण्टापछि अन्त्येष्टि गृहमा आइपुगिन् । नक्कली धितो कागजात थियो जसमा पेङले उनीसँग २ लाख ८० हजार डलर लिएको विवरण लेखिएको थियो ।

अन्त्येष्टि अघि उनले कामदारहरूलाई आफू पेङकी घनिष्ठ साथी भएको र उनलाई श्रद्धाञ्जली दिन चाहेको बताइन्। पेङको शवलाई शववाहनमा राख्दा ली गाडीमा चढिन् । उनले शव खोलेर कागजको टुक्रामा पेङको औंठाछाप लिँदै गरेको देखियो।

यो देखेपछि अन्त्येष्टी गर्ने एक कर्मचारीले पेङको परिवारलाई खबर गरे, जसले प्रहरीलाई बोलाए। अधिकारीहरूले लीलाई पक्राउ गरे र नक्कली कागजात, बैंक चेक र मसीको प्याड जफत गरे।

ती महिलाले प्रहरी समक्ष आफूलाई पेङलाई दिएको पैसा फिर्ता नहुने डर भएको स्वीकार गरिन् । त्यसैले, उनले मे २३, २०१० मा पेङलाई दिएको ऋणवापतको जग्गा धितोको कागजात र लीलाई भुक्तानी गर्न पेङको नाममा जारी गरिएको ८५ लाख युआनको प्रतिज्ञा पत्र जाली बनाइन्।

लीलाई कागजातहरू जालसाजी गरेको आरोपमा दुई वर्षको जेल सजाय सुनाइएको थियो। तर, न्यायाधीशले उनको सजाय पाँच वर्षको लागि निलम्बन गरिदिएका थिए किनभने उनले दोषी स्वीकार गरेकी थिइन् र नक्कली बैंक चेकहरू अझै प्रशोधन गरिएको थिएन।

लीलाई सरकारलाई १,६०० डलर तिर्न र सरकारी विभाग वा सार्वजनिक कल्याणकारी संस्थाहरूमा कुल ९० घण्टा स्वैच्छिक श्रम प्रदान गर्न आदेश दिइएको थियो। दाहसंस्कार केन्द्रका एक कर्मचारीले भने, “म दुई दशकदेखि अन्त्येष्टि गृहमा काम गर्दै आएको छु। मैले यस्तो घटना पहिले कहिल्यै देखेको थिइनँ।”