काठमाडौं । अमेरिकी राष्ट्रपति डोनाल्ड ट्रम्पले ३० भन्दा बढी देशहरूमा यात्रा प्रतिबन्ध विस्तार गर्ने तयारी गरिरहेको अमेरिकी गृह सुरक्षा सचिव क्रिस्टी नोएमले बिहीबार फक्स न्यूजको “द इन्ग्राहम एंगल” मा बताइन्।

क्रिस्टी नोएमले भनिन्, ‘म संख्याको बारेमा स्पष्ट बताउदिन, तर यो ३० भन्दा बढी छ, राष्ट्रपतिले यी देशहरूको मूल्याङ्कन गर्न जारी राखेका छन्।’

ट्रम्पसँगको उनको हालैको भेटपछि नोएमले सामाजिक सञ्जालमा एउटा पोस्ट सेयर गरेकी थिइन् जसमा उनले अमेरिकामा अपराधलाई बढावा दिने कुनै पनि देशमाथि पूर्ण यात्रा प्रतिबन्ध लगाउन आह्वान गरेकी थिइन्।

गत महिना ह्वाइट हाउस नजिकै एक अफगानी शरणार्थीले राष्ट्रिय गार्ड्समेनमाथि गोलीबारी गरेपछि ट्रम्पले १९ देशका नागरिकहरूलाई अमेरिकी नागरिकता र ग्रिन कार्ड दिने प्रक्रिया पहिले नै रोकिसकेका थिए।

यी देशहरूमा अफगानिस्तान, म्यानमार, बुरुन्डी, चाड, कंगो, क्युबा, इक्वेटोरियल गिनी, इरिट्रिया, हैटी, इरान, लाओस, लिबिया, सियरा लियोन, सोमालिया, सुडान, टोगो, तुर्कमेनिस्तान, भेनेजुएला र यमन समावेश छन्।

अमेरिकी नागरिकता तथा आप्रवासन सेवाले ट्रम्पले पहिले नै यी १९ देशहरूमा यात्रा प्रतिबन्ध लगाइसकेकाले यी १९ देशहरूबाट सबै आप्रवासन, नागरिकता र ग्रिन कार्ड आवेदनहरू रोकिने बताएको छ।

ट्रम्प भन्छन् – यी उपायहरूले अवैध र समस्याग्रस्त जनसंख्यालाई कम गर्नेछन्। उनले यो पनि दाबी गर्छन् – दोस्रो विश्वयुद्ध पछि अमेरिकामा त्यस्तो सामाजिक समस्या थिएन, तर अहिले त्रुटिपूर्ण आप्रवासन नीतिका कारण अपराध र अव्यवस्था बढेको छ।

उनको विश्वास छ – प्राविधिक प्रगतिको बावजुद, त्रुटिपूर्ण आप्रवासन नीतिहरूले सामान्य अमेरिकीहरूको जीवन बर्बाद पारेको छ। ट्रम्पले स्पष्ट रूपमा भने, “यस समस्याको एक मात्र समाधान रिभर्स माइग्रेसन हो, अर्थात् मानिसहरूलाई उनीहरूको गृह देशमा फिर्ता पठाउनु हो।”