काठमाडौं । असमको होजाई जिल्लामा शनिबार बिहान हात्तीसँग ठोक्किएपछि रेल दुर्घटना भएको छ। इन्जिनसहित पाँचवटा डिब्बाहरू लिकबाट बाहिर पुगेका छन्।

समाचार एजेन्सी पीटीआईका अनुसार यस घटनामा आठ हात्ती मारिएका छन् भने एउटा हात्ती घाइते भएको छ।

रेलवेले यस घटनामा कुनै पनि यात्रु घाइते नभएको दाबी गरेको छ।

उत्तर पूर्व सीमान्त रेलवे (एनएफआर) का प्रवक्ताले यस घटनामा रेलको इन्जिन सहित पाँचवटा कोच पटरीबाट खसेको बताए ।

“घटना त्यस्तो क्षेत्रमा भएको हो जुन तोकिएको हात्ती करिडोर होइन,” एनएफआरद्वारा जारी विज्ञप्तिमा भनिएको छ।

“हात्तीहरूको बथान देख्ने बित्तिकै लोको पाइलटले आपतकालीन ब्रेक लगाए। यद्यपि, यसको बाबजुद पनि, हात्तीहरू रेलसँग ठोक्किए।”

प्रवक्ताका अनुसार नयाँ दिल्ली जाँदै गरेको यो रेल बिहान २.१७ बजे दुर्घटनामा परेको हो।