काठमाडौं । पश्चिम बंगालमा भारतीय जनता पार्टी (बीजेपी) का नेता तथा वर्तमान विपक्षी दलका नेता शुभेन्दु अधिकारीका स्वकीय सचिव (पीए) चन्द्रनाथ रथको बुधबार राति गोली हानी हत्या गरिएको छ।

बीबीसी संवाददाता दिलनवाज पाशाका अनुसार यो घटना राजधानी कोलकाता नजिकैको मध्यमग्राममा भएको हो। समाचार एजेन्सीहरूले जारी गरेका भिडियोहरूमा चन्द्रनाथ रथलाई अस्पताल लैजाँदै गरेको देखाइएको छ। उनी सवार गाडीमा विधानसभा प्रवेश पासको स्टिकर समेत टाँसिएको छ।

बीजेपीले चन्द्रनाथ रथको हत्यालाई ‘सुनियोजित’ बताएको छ। तृणमूल कांग्रेस (टीएमसी) ले घटनाको निंदा गर्दै यसको अनुसन्धानको माग गरेको छ। प्रहरीले घटनाको अनुसन्धान सुरु गरिसकेको जानकारी दिएको छ।

उल्लेखनीय छ कि शुभेन्दु अधिकारीले हालै भएको निर्वाचनमा भवानीपुरबाट टीएमसी नेता तथा निवर्तमान मुख्यमन्त्री ममता बनर्जीलाई करिब १५ हजार मतान्तरले पराजित गरेका थिए।

पश्चिम बंगालको निर्वाचन परिणामपछि हिंसात्मक घटनाहरू हुन सक्ने आशंका गरिएको थियो। राज्यमा तोडफोड र हिंसाका धेरै खबरहरू बाहिरिएपछि भारतीय जनता पार्टीले विज्ञप्ति जारी गर्दै तृणमूल कांग्रेसका मानिसहरूले आफ्नो पहिचान बदलेर यस्ता घटना गराइरहेको र यसलाई सहन नसकिने आरोप लगाएको थियो।

राज्यका डीजीपी सिद्ध नाथ गुप्ताले समाचार एजेन्सीसँग भने, “यस मामिलाको अनुसन्धान सुरु गरिएको छ। अपराधमा प्रयोग गरिएको गाडी जफत गरिएको छ, तर गाडीको नम्बर प्लेट गलत पाइएको छ। हामीले घटनास्थलबाट जीवित कारतूसहरू पनि फेला पारेका छौँ। प्रत्यक्षदर्शीहरूको बयान र अहिलेसम्म प्राप्त प्रमाणका आधारमा अनुसन्धानलाई अगाडि बढाइएको छ।”

यसैबीच, शुभेन्दु अधिकारीले घटनाको बारेमा टिप्पणी गर्दै भने, “यो एउटा सुनियोजित हत्या थियो। डीजीपीले पनि यही बताउनुभएको छ। २–३ दिनअघि रेकी गरिएको थियो।” उनले यो टीएमसीको १५ वर्षको ‘महाजंगलराज’ को परिणाम भएको आरोप समेत लगाए।

अधिकारीले अगाडि भने, “हामी सबै शोकमा छौँ। आफ्नो पीडा व्यक्त गर्न हामीसँग शब्द छैन। हाम्रो केन्द्रीय नेतृत्वले घटनाको जानकारी लिएको छ। क्याबिनेट मन्त्री सुकान्त मजुमदारले चन्द्रनाथ रथको परिवार र प्रहरीसँग कुरा गर्नुभएको छ। पूरा पार्टी यस मामिलामा एकजुट छ।”

अर्कोतर्फ, तृणमूल कांग्रेसले एक विज्ञप्ति जारी गर्दै भनेको छ, “हामी मध्यमग्राममा चन्द्रनाथ रथको क्रूर हत्या र निर्वाचनपछिको हिंसामा बीजेपीका कार्यकर्ताहरूद्वारा मारिएका तीन टीएमसी कार्यकर्ताको हत्याको निंदा गर्दछौँ।” टीएमसीले यस पूरा घटनाक्रममा कडा कारबाहीको माग गरेको छ।

पार्टीले विज्ञप्तिमा अगाडि भनेको छ, “हामी अदालतको निगरानीमा सीबीआई अनुसन्धानको माग गर्दछौँ, ताकि दोषीहरूको पहिचान गरी उनीहरूलाई बिना ढिलाइ न्यायको कठघरामा उभ्याउन सकियोस्। लोकतन्त्रमा हिंसा र राजनीतिक हत्याको कुनै स्थान छैन र दोषीहरूलाई चाँडै जबाफदेही बनाइनुपर्छ।”

समाचार एजेन्सी पीटीआईका अनुसार ४१ वर्षीय चन्द्रनाथ रथ मूल रूपमा पूर्व मेदिनीपुर जिल्लाको चान्दिपुरका बासिन्दा थिए। उनी शुभेन्दु अधिकारीका अत्यन्त नजिकका पात्र थिए र राज्यको राजनीतिमा अधिकारीको उदयको श्रेय उनलाई पनि दिइन्छ।

वर्षौँसम्म अधिकारीको भित्री समूह (इनर सर्कल) को हिस्सा भए तापनि उनी धेरैजसो पर्दा पछाडि नै रहे। सक्रिय राजनीतिक सङ्गठनमा आउनुअघि रथले रामकृष्ण मिसनबाट आफ्नो अध्ययन पूरा गरेर झन्डै दुई दशक भारतीय वायुसेनामा बिताएका थिए। परिवारका निकटस्थहरूका अनुसार विद्यार्थी जीवनमा उनी रामकृष्ण मिसनको विचारधाराबाट गहिरो रूपमा प्रभावित थिए।

वायुसेनाबाट स्वेच्छिक अवकाश लिएपछि उनले केही समय कर्पोरेट क्षेत्रमा काम गरे र बिस्तारै राजनीतिक समन्वय तथा प्रशासनिक जिम्मेवारीमा प्रवेश गरे। अधिकारीको परिवार जस्तै उनको परिवार पनि पहिले तृणमूल कांग्रेससँग आबद्ध थियो। परिवारका परिचितहरूका अनुसार रथ परिवार र अधिकारी परिवारबीचको सम्बन्ध दुई दशकभन्दा पुरानो छ, जुन पूर्व मेदिनीपुरमा टीएमसीको विस्तारको सुरुवाती वर्षहरूदेखि जोडिएको छ।

उनी भवानीपुर अभियान लगायत धेरै ‘हाई–भोल्टेज’ राजनीतिक लडाइँका क्रममा बीजेपीको कोर टिमको हिस्सा थिए। बीजेपी सङ्गठनभित्र यस्तो अड्कलबाजी समेत थियो कि यदि निर्वाचनपछि अधिकारीले सरकारमा ठूलो भूमिका सम्हालेमा रथलाई महत्त्वपूर्ण प्रशासनिक जिम्मेवारी सुम्पिन सकिनेछ। उनको हत्याले राज्यमा पुन: तनावपूर्ण स्थिति सिर्जना भएको छ।