काठमाडाैं। अमेरिकाको डेनभर अन्तर्राष्ट्रिय विमानस्थलमा शुक्रबार राति एउटा दुखद र असामान्य दुर्घटना भएको छ। लस एन्जलसका लागि उडान भर्ने तयारीमा रहेको फ्रन्टियर एयरलाइन्सको विमानले धावनमार्गमा एक व्यक्तिलाई ठक्कर दिँदा उनको घटनास्थलमै मृत्यु भएको छ।

विमानस्थलले जारी गरेको विज्ञप्ति अनुसार ती व्यक्ति सुरक्षा घेरा तोडेर अनाधिकृत रूपमा विमानस्थल भित्र छिरेका थिए र धावनमार्ग पार गर्ने क्रममा तीव्र गतिमा गुडिरहेको विमानसँग ठोक्किएका थिए।

विमानको ठक्करबाट इन्जिनमा सामान्य आगो सल्किएको थियो भने क्याबिन भित्र धुवाँ भरिएको थियो। स्थिति गम्भीर भएपछि विमानमा सवार सबै २२४ जनालाई आपतकालीन स्लाइडहरूको सहायताले सुरक्षित रूपमा बाहिर निकालिएको थियो।

डेनभर अग्नि नियन्त्रण विभागले इन्जिनको आगोलाई तुरुन्तै निभाउन सफल भएको थियो। एयर ट्राफिक कन्ट्रोलको अडियो रेकर्डिङमा पाइलटले उडानको अनुमति पाएको केही सेकेन्डमै ‘हामीले कसैलाई ठक्कर दियौं र इन्जिनमा आगो लाग्यो’ भन्दै टावरलाई खबर गरेको सुनिन्छ।

फ्रन्टियर एयरलाइन्सले यस हृदयविदारक घटनाप्रति गहिरो दुःख व्यक्त गरेको छ। स्थानीय समय अनुसार राति ११ बजे भएको यो दुर्घटनाको विषयमा अधिकारीहरूले थप अनुसन्धान गरिरहेका छन्। सुरक्षा घेरा पार गरेर ती व्यक्ति कसरी धावनमार्गसम्म पुग्न सफल भए भन्ने विषयमा विमानस्थलको सुरक्षा व्यवस्थामाथि पनि प्रश्न उठेको छ।