काठमाडौं । रुसी राष्ट्रपति भ्लादिमिर पुटिनले मे १९ र २० मा चीनको औपचारिक भ्रमण गर्नेछन् । उनलाई चिनियाँ राष्ट्रपति सी जिनपिङले निमन्त्रणा गरेका छन् ।

रुसले पुटिनको भ्रमण ‘दुई देशबीचको सद्भावना, मैत्री र पारस्परिक सहयोग सम्बन्धी सम्झौता’ मा हस्ताक्षर भएको २५ औं वार्षिकोत्सवको अवसरमा हुन लागेको बताएको छ ।

भ्लादिमिर पुटिनको यो भ्रमण अमेरिकी राष्ट्रपति डोनाल्ड ट्रम्पको बेइजिङ भ्रमणपछि हुन लागेको हो।

बीबीसी फारसीका अनुसार, क्रेमलिनको एक विज्ञप्तिमा भ्रमणको क्रममा पुटिनले आफ्ना चिनियाँ समकक्षी सी जिनपिङसँग रूस र चीन बीचको “व्यापक साझेदारी र रणनीतिक सहयोग” बारे छलफल गर्ने बताइएको छ।

क्रेमलिनका अनुसार दुई देशका नेताहरूले “महत्वपूर्ण अन्तर्राष्ट्रिय र क्षेत्रीय मुद्दाहरू” मा पनि विचार आदानप्रदान गर्नेछन् र वार्ताको अन्त्यमा संयुक्त वक्तव्यमा हस्ताक्षर गर्नेछन्।

पश्चिमी देशहरूले रुसी तेल र ग्यासमा प्रतिबन्ध लगाएपछि चीन रुसको सबैभन्दा महत्त्वपूर्ण आर्थिक साझेदार बनेको छ।