काठमाडौं। राजधानीको सबैभन्दा व्यस्त व्यापारिक तथा प्रशासनिक क्षेत्र बानेश्वरमा फुटपाथ निर्माण र मर्मतसम्भारको नाममा भइरहेको लापरबाहीका कारण पैदल यात्रुहरू जोखिमपूर्ण यात्रा गर्न बाध्य भएका छन्।

यस क्षेत्रमा योजनाबद्ध रूपमा काम गर्नुको सट्टा पटक-पटक फुटपाथका इँटाहरू उखेल्ने र पुनः बिछ्याउने कार्य दोहोरिँदा दैनिक आवतजावत गर्ने सर्वसाधारणले निकै ठूलो सास्ती खेप्नुपरेको हो।

फुटपाथ क्षेत्रमा जथाभावी रूपमा छरपस्ट छाडिएका इँटा, कङ्क्रिट ब्लक र निर्माणका क्रममा पारिएका ठूला-ठूला खाल्डाहरू सरोकारवाला निकायले समयमै व्यवस्थापन नगर्दा मुख्य सडक किनारको पैदल यात्रा निकै साँगुरो र चुनौतीपूर्ण बनेको छ।

यस किसिमको अव्यवस्थित निर्माण कार्यले गर्दा विशेषगरी शारीरिक रूपमा अशक्त व्यक्तिहरू, ज्येष्ठ नागरिक, महिला तथा दृष्टिविहीनहरूलाई हिँडडुल गर्न निकै कठिन भएको छ।

उज्यालो कम हुने रातको समयमा सडक किनारमा थुपारिएका ती तीखा इँटा र खुला खाल्डाका कारण सर्वसाधारणहरू लड्ने र चोटपटक लाग्ने सम्भावना अझ बढेर गएको छ।

निर्माण सामग्रीहरूलाई सुरक्षित र व्यवस्थित ठाउँमा राख्नुको सट्टा सडक र फुटपाथकै मुख्य भाग ओगट्ने गरी अलपत्र छाडिँदा एकातिर सहरी कुरुपता बढेको छ भने अर्कोतिर सडक दुर्घटनाको जोखिमसमेत निकै उच्च बनाएको छ।

व्यस्त सडकको यस बेथितिलाई तत्काल नियन्त्रण गरी पैदल यात्रुको अधिकार सुरक्षित गर्न स्थानीय बासिन्दा तथा नागरिक समाजले सम्बन्धित निकायसँग जोडदार माग गरेका छन्।