काठमाडाैं। सरकारले आगामी आर्थिक वर्षदेखि सेयर कारोबारमा लाग्दै आएको पूँजीगत लाभकरलाई अन्तिम करका रूपमा घोषणा गरेको छ।

अर्थमन्त्री डा. स्वर्णिम वाग्लेले संघीय संसदमा आगामी आर्थिक वर्ष २०८३/८४ को बजेट वक्तव्य प्रस्तुत गर्दै सेयर कारोबारमा भएको लाभमा तिर्नुपर्ने पूँजीगत लाभकर नै अन्तिम हुने र त्यसपछि थप कुनै कर नलाग्ने स्पष्ट पारेका हुन्।

यस नयाँ व्यवस्थासँगै सेयर बजारबाट भएको पूँजीगत लाभ अब लगानीकर्ताको कुल व्यक्तिगत आयमा गणना हुने छैन र यसलाई व्यक्तिगत आयकरको स्ल्याबभित्र समावेश गरिने छैन।

यसअघि सेयर होल्डरहरूले १ वर्षभन्दा कम अवधिका लागि ७.५ प्रतिशत र १ वर्षभन्दा लामो अवधिका लागि ५ प्रतिशत पूँजीगत लाभकर तिर्दै आएका थिए।

सरकारको यस घोषणाले लामो समयदेखि अन्योलमा रहेको सेयर बजारको कर विवादलाई स्थायी रूपमा समाधान गर्दै लगानीकर्ताको मनोबल उच्च बनाउने अपेक्षा गरिएको छ।