काठमाडौं। परराष्ट्रमन्त्री शिशिर खनाल भारतका विदेशमन्त्री डा. एस जयशंकरको मैत्रीपूर्ण निमन्त्रणामा आगामी जेठ २२ देखि २४ गतेसम्म भारतको औपचारिक भ्रमणमा जाने भएका छन्।

परराष्ट्र मन्त्रालयका अनुसार भ्रमणका क्रममा परराष्ट्रमन्त्री खनालले आफ्ना भारतीय समकक्षी डा. जयशंकरसँग औपचारिक भेटवार्ता गर्ने कार्यक्रम तय भएको छ।

दुई देशका विदेशमन्त्रीहरूबीच हुने यस उच्चस्तरीय भेटघाटमा नेपाल र भारतबीचको द्विपक्षीय व्यापार, लगानी, सम्पर्क सञ्जाल (कनेक्टिभिटी), ऊर्जा तथा जनस्तरको सम्बन्धलगायतका विविध महत्त्वपूर्ण विषयहरूमा केन्द्रित रहेर छलफल हुनेछ।

नेपाल र भारतबीच हुँदै आएको उच्चस्तरीय भ्रमणको नियमित आदानप्रदानकै एक हिस्साका रूपमा हेरिएको यस भ्रमणले दुई देशबीच रहिआएको बहुआयामिक सम्बन्धलाई अझ सुदृढ तुल्याउन सहयोग पुर्‍याउने विश्वास मन्त्रालयले लिएको छ।

पछिल्लो समय नेपाल र भारतबीचको कुटनीतिक तथा राजनीतिक सरगर्मी बढिरहेका बेला यो भ्रमण हुन लागेको हो। यसै सिलसिलामा राष्ट्रिय स्वतन्त्र पार्टी (रास्वपा) का सभापति रवि लामिछानेको हालै भएको भारत भ्रमण र त्यस क्रममा भएका राजनीतिक भेटघाटहरूले पनि दुई देशबीचको सम्बन्धमा नयाँ आयाम थपेको चर्चा राजनीतिक वृत्तमा भइरहेको छ।

लामिछानेले आफ्नो भ्रमणका क्रममा नेपाल-भारत सम्बन्धलाई जनस्तर र राजनीतिक स्तरमा थप परिपक्व बनाउनुपर्ने धारणा राख्दै आएका छन्, जसले गर्दा परराष्ट्रमन्त्रीको यो आसन्न भ्रमणलाई अझ बढी चासोका साथ हेरिएको छ।

अर्कोतर्फ, प्रधानमन्त्री बालेन (बालेन्द्र) शाहले नेपाल र भारतबीचको सीमा विवादका विषयमा सार्वजनिक रूपमा दिएको कडा अभिव्यक्तिका कारण यो भ्रमण थप चुनौतीपूर्ण र महत्त्वपूर्ण बनेको छ।

प्रधानमन्त्री बालेनले सीमा सुरक्षा, मिचिएका नेपाली भूभाग र सन् १९५० को सन्धि परिमार्जन जस्ता विषयहरूमा नेपालले आफ्नो स्पष्ट र दृढ अडान राख्नुपर्ने बताउँदै आएका छन्।

प्रधानमन्त्रीको यस्तो राष्ट्रवादी र स्पष्ट अभिव्यक्तिका बीच परराष्ट्रमन्त्री खनाल भारत जान लागेकाले, नयाँदिल्लीमा हुने औपचारिक वार्तामा सीमा विवाद र आपसी विश्वासको वातावरण तय गर्ने विषयले प्राथमिकता पाउने अनुमान गरिएको छ। औपचारिक भ्रमण सम्पन्न गरी परराष्ट्रमन्त्री खनाल यही जेठ २४ गते काठमाडौं फर्कने कार्यक्रम रहेको छ।