काठमाडौं । आफ्नो नजिकको मानिस गुमाउनुको पीडा र याद कति गहिरो हुन्छ भन्ने एउटा अनुपम र भावुक उदाहरण सामाजिक सञ्जालमा चर्चाको विषय बनेको छ ।

अमेरिकाकी चेस्टिटी प्याटरसन नाम गरेकी एक युवतीले आफ्ना दिवंगत बुबाको यादमा विगत चार वर्षदेखि एउटा यस्तो नम्बरमा लगातार सन्देश (म्यासेज) पठाइरहेकी थिइन्, जहाँबाट जवाफ आउने कुनै सम्भावना थिएन ।

तर, बुबाको चौथो पुण्यतिथिमा उनले पठाएको म्यासेजमा जब अचानक प्रत्युत्तर आयो, त्यसले उनलाई मात्र होइन, संसारभरका लाखौँ मानिसलाई भावुक बनाएको छ ।

सन् २०१५ मा आफ्ना पितालाई गुमाएपछि चेस्टिटी निकै एक्ली भएकी थिइन् । बुबासँगको सामीप्यता र सम्झनालाई जीवित राख्न उनले बुबाको पुरानो मोबाइल नम्बरमा नियमित रूपमा म्यासेज पठाउन सुरु गरिन् ।

बुबाले माथिबाटै आफ्ना कुरा सुनिरहनुभएको छ भन्ने महसुस गर्न उनले जीवनका हरेक साना-ठूला उतारचढाव, खुसी, पीडा र आफ्ना उपलब्धिहरू सोही नम्बरमा लेखेर पठाउने गर्थिन् । यो क्रम लगातार चार वर्षसम्म चलिरह्यो ।

सन् २०१९ मा बुबा बितेको चार वर्ष पुगेको दिन चेस्टिटीले एउटा लामो र अत्यन्तै भावुक सन्देश पठाइन् । उनले म्यासेजमा आफूले क्यान्सरजस्तो गम्भीर रोगलाई जितेको, कलेज उत्कृष्ट अंकसहित उत्तीर्ण गरेको र जीवनका कयौँ कठिन मोडहरू पार गरेको उल्लेख गर्दै यी सबै कुरा हेर्न बुबा साथमा हुनुभएको भए भनी आफ्नो दुःख पोखेकी थिइन् ।

सधैँझैँ यसपटक पनि उनलाई कुनै जवाफको आशा थिएन, तर केही समयमै उनको फोनमा एउटा लामो रिप्लाई आयो, जसले उनलाई छाँगाबाट खसेझैँ बनायो ।

उक्त नम्बरबाट जवाफ फर्काउने व्यक्ति ‘ब्राड’ नामका एक पुरुष थिए, जसले विगत केही वर्षदेखि त्यो सिमकार्ड प्रयोग गरिरहेका थिए । ब्राडले म्यासेजमा लेखेका थिए – उनी विगत चार वर्षदेखि चेस्टिटीले पठाएका हरेक सन्देशहरू पढिरहेका थिए, तर उनी र उनको बुबाबीचको यो भावनात्मक सम्बन्धमा बाधा नपुगोस् भन्नका लागि उनले जानाजानी कहिल्यै जवाफ दिएका थिएनन् ।

ब्राडले चेस्टिटीको हिम्मत र प्रगतिलाई नियालिरहेको र उनको सफलताले आफूलाई सधैँ खुसी तुल्याउने गरेको बताए । उनले सन्देशमा एउटा दुःखद रहस्य पनि खोले – ब्राडले केही वर्षअघि एउटा सडक दुर्घटनामा आफ्नी छोरी गुमाएका थिए । छोरी गुमाउनुको पीडामा छटपटाइरहेका उनका लागि चेस्टिटीका ती सन्देशहरू बाँच्ने र अगाडि बढ्ने एउटा बलियो सहारा बनेका थिए ।

ब्राडले चेस्टिटीलाई लेखेका छन्, “तिम्रा म्यासेजहरूले मलाई जीवित राखे । तिमी मेरी दिवंगत छोरी जस्तै हौ र तिम्रा बुबा तिम्रो प्रगति देखेर पक्कै पनि स्वर्गमा निकै गर्व गरिरहनुभएको होला ।”

दुई अपरिचित व्यक्तिहरू कसरी एउटै पीडा र एउटा पुरानो फोन नम्बरका माध्यमबाट भावनात्मक रूपमा जोडिन पुगे भन्ने यो दुर्लभ कथा इन्टरनेटमा निकै भाइरल भइरहेको छ । मानवीय संवेदना, सम्बन्ध र आशाको यो अनुपम उदाहरणले संसारभरका लाखौँ पाठकहरूको आँखा रसाएका छन् ।