मियामी, अमेरिका। फिफा विश्वकपमा पहिलो पटक डेब्यु गरिरहेको अफ्रिकी राष्ट्र केप भर्डेले आफ्नो जादुमयी र सनसनीपूर्ण प्रदर्शनलाई जारी राख्दै दुई पटकको पूर्व विश्वविजेता उरुग्वेलाई रोमाञ्चक बराबरीमा रोकेको छ।

मियामीस्थित हार्ड रक स्टेडियममा सोमबार बिहान सम्पन्न समूह ‘एच’ को तनावपूर्ण र रोमाञ्चक खेलमा केप भर्डेले बलियो उरुग्वेसँग २–२ गोलको बराबरी खेल्दै बहुमूल्य अंक खोस्न सफल भएको हो।

प्रतियोगिताको आफ्नो पहिलो खेलमा उपाधि दाबेदार स्पेनलाई गोलरहित बराबरीमा रोकेर विश्व फुटबललाई आश्चर्यमा पारेको केप भर्डेले उरुग्वेविरुद्ध पनि सोही उच्च मनोबलका साथ मैदान उत्रिएर उत्कृष्ट फुटबल पस्किएको थियो।

खेलको सुरुवाती समयदेखि नै उरुग्वेलाई कडा टक्कर दिएको केप भर्डेले २१ औं मिनेटमा अप्रत्याशित अग्रता लिँदै मैदानमा उपस्थित दर्शकलाई स्तब्ध बनाएको थियो। टोलीका भरपर्दा मिडफिल्डर केभिन पिनाले करिब ३० यार्ड टाढाबाट प्रहार गरेको सशक्त फ्रिकिक उरुग्वेको डिफेन्सिभ वालको बीचबाट छिर्दै सीधै गोलमा परिणत भएको थियो।

तर, सुरुवाती अग्रतापछि केप भर्डेको डिफेन्स लाइनमा केही असमझदारी देखिन थाल्यो, जसको फाइदा उरुग्वेका सचेत स्ट्राइकरहरूले उठाए। खेलको ३८ औं मिनेटमा केप भर्डेका डिफेन्डर सिड्नी लोपेस काब्रालले आफ्नै पोस्टतर्फ क्लियर गर्न खोजेको बललाई उरुग्वेका विङ्गर म्याक्सी अराउजोले उत्कृष्ट डाइभिङ हेडरमार्फत गोल गर्दै खेललाई १-१ को बराबरीमा ल्याए। पहिलो हाफको इन्जुरी समयमा अगस्टिन कानोबियोले प्रहार गरेको बलले पोस्टको दिशा लिएपछि उरुग्वेले पहिलो हाफमा २–१ को अग्रता बनाउन सफल भयो।

दोस्रो हाफमा दक्षिण अमेरिकी पावरहाउस उरुग्वेले आफ्नो बलियो ‘प्रेसिङ गेम’ मार्फत खेलमा दबाब बढाएको थियो, जसका कारण केप भर्डेका खेलाडीहरूलाई बल अगाडि बढाउन निकै कठिन भइरहेको देखिन्थ्यो।

तर, खेलको ७२ औं मिनेटमा उरुग्वेको डिफेन्समा भएको एउटा गम्भीर गल्तीको फाइदा उठाउँदै केप भर्डेले खेलमा सानदार पुनरागमन गर्‍यो। उरुग्वेका डिफेन्डर म्याथियास ओलिभेराले आफ्नै पेनाल्टी बक्सभित्र दिएको गलत ब्याक–पासलाई केप भर्डेका फरवार्ड हेलियो वारेलाले डिफेन्डरको खुट्टाबाट खोस्दै उरुग्वेका गोलकिपरलाई समेत छलाएर बललाई खाली पोस्टमा सजीलै छिराए।

खेलको अन्त्यतिर उरुग्वेका मुख्य स्टार एवं रियल म्याड्रिडका मिडफिल्डर फेडरिको भाल्भर्डेले डिबक्स बाहिरबाट प्रहार गर्दै उत्कृष्ट गोल गरे पनि भिडियो असिस्टेन्ट रेफ्री (VAR) ले त्यसलाई अफसाइड घोषित गरिदिएपछि उरुग्वे जितको नजिक पुगेर पनि विमुख हुन पुग्यो। इन्जुरी समयमा दुवै टोलीले गोलका केही सुनौला अवसरहरू सिर्जना गरे पनि फिनिसिङमा चुकेका थिए।

यो रोमान्चक बराबरीसँगै समूह ‘एच’ मा दुई खेलको समाप्तिपछि समान २ अंक जोडेका उरुग्वे गोलअन्तरका आधारमा दोस्रो र केप भर्डे तेस्रो स्थानमा रहेका छन्। यसअघि यसै समूहको अर्को खेलमा साउदी अरेबियामाथि ४–० को जित निकाल्दै स्पेन ४ अंकसहित शीर्ष स्थानमा उक्लिइसकेको छ।

अब नकआउट चरण (राउन्ड अफ १६) मा पुग्नका लागि समूह चरणको अन्तिम खेल दुवै टोलीका लागि निर्णायक हुनेछ, जहाँ केप भर्डेले साउदी अरेबियाको सामना गर्नेछ भने उरुग्वेले समूहको शीर्ष स्थानमा रहेको बलियो स्पेनविरुद्ध ‘गर या मर’ को प्रतिस्पर्धा गर्नेछ।