काठमाडाैं। जारी फिफा विश्वकप २०२६ मा विश्व फुटबलका स्थापित सुपरस्टार र उदाउँदा युवा प्रतिभाहरूबीचको अभूतपूर्व प्रतिस्पर्धाले प्रतियोगितालाई ऐतिहासिक र रोचक मोडमा पुर्‍याएको छ।

विश्व फुटबलकै सर्वकालीन महान् खेलाडीमध्येका एक, अर्जेन्टिनी कप्तान लियोनल मेस्सीले आफ्नो खेल जीवनको सम्भवतः अन्तिम विश्वकपमा पनि जादुमयी प्रदर्शनलाई निरन्तरता दिँदै कीर्तिमानमाथि कीर्तिमान थपिरहेका छन्।

३९ वर्षको उमेर नजिक पुग्दा समेत मेस्सीको खेल कौशल, शान्त फिनिसिङ क्षमता र निर्णायक क्षणमा नतिजा उल्ट्याउने शैलीमा कुनै ह्रास आएको छैन।

जारी प्रतियोगिताको समूह चरण अन्तर्गत पहिलो खेलमा सानदार ह्याट्रिक गरेका मेस्सीले अस्ट्रियाविरुद्धको खेलमा समेत उत्कृष्ट दुई गोल गर्दै अर्जेन्टिनालाई २-० को जित दिलाएका थिए।

यस जितसँगै अर्जेन्टिना समूह ‘बी’ को शीर्ष स्थानमा रहँदै नकआउट चरणमा प्रवेश गरिसकेको छ भने मेस्सी स्वयं पनि प्रतियोगिताको सर्वाधिक गोलकर्ता बन्दै गोल्डेन बुटको दौडमा सबैभन्दा अगाडि देखिएका छन्।

यद्यपि, यसपटकको विश्वकपको चर्चा केवल मेस्सीमा मात्र केन्द्रित छैन। फ्रान्सका स्टार स्ट्राइकर केलियन एमबाप्पेले पनि मैदानमा आफ्नो गति र गोल गर्ने सानदार क्षमता प्रदर्शन गर्दै मेस्सीलाई गोल्डेन बुटको दौडमा कडा चुनौती दिइरहेका छन्।

सन् २०२२ को कतार विश्वकपको फाइनलमा ऐतिहासिक भिडन्त गरेका मेस्सी र एमबाप्पेबीचको यो टक्करले यसपटक पनि फुटबल प्रेमीहरूलाई पुनः अर्जेन्टिना र फ्रान्सबीचको फाइनल खेलको रोमाञ्चक सम्भावनातिर आकर्षित गरेको छ।

फ्रान्सले पनि समूह चरणमा उत्कृष्ट प्रदर्शन गर्दै अन्तिम १६ को यात्रा तय गरिसकेको अवस्थामा यी दुई सुपरस्टारको प्रतिद्वन्द्विताले प्रतियोगितालाई थप गर्माएको छ।

अनुभवी खेलाडीहरू आफ्नो विरासत जोगाउन प्रयासरत रहँदा विश्व फुटबलमा नयाँ युगको संकेत गर्दै युवा पुस्ताका खेलाडीहरूले पनि बलियो उपस्थिति जनाएका छन्।

यसै विश्वकपमार्फत विश्व मञ्चमा उदाएका स्पेनका १८ वर्षीय विङ्गर लामिन यामालले आफ्नो पहिलो खेलमै गोल गर्दै टोलीलाई ४-० को सानदार जित दिलाए र आफूलाई भविष्यको विश्वकप सुपरस्टारका रूपमा उभ्याए।

यस्तै, नर्वेका गोल मेसिन एर्लिङ हाल्यान्डले पनि समूह ‘आइ’ अन्तर्गत सेनेगलविरुद्धको रोमाञ्चक खेलमा दुई गोल गर्दै टोलीलाई ३-२ को जितसहित नकआउट चरणमा पुर्‍याउन मुख्य भूमिका खेलेका छन्। हाल्यान्ड र एमबाप्पेसँगै इंग्ल्यान्डका कप्तान ह्यारी केनले पनि उच्च प्रदर्शन गर्दै गोल्डेन बुटको उपाधिमाथि आफ्नो बलियो दाबी प्रस्तुत गरिरहेका छन्।

खेल विश्लेषकहरूका अनुसार यो विश्वकप केवल एउटा उपाधिका लागि खेलिने प्रतियोगिता मात्र नभएर फुटबल इतिहासमा पुस्ता परिवर्तनको एउटा टर्निङ प्वाइन्ट (मोड) पनि हो।

एकातर्फ मेस्सी र एमबाप्पे जस्ता खेलाडीहरू आफ्नो साम्राज्य अक्षुण्ण राख्न लडिरहेका छन् भने अर्कातर्फ यामाल र हाल्यान्ड जस्ता युवा प्रतिभाहरू भविष्यको फुटबललाई आफ्नो नियन्त्रणमा लिन पूर्ण रूपमा तयार भइसकेका देखिन्छन्।

यसरी एकातिर इतिहासको सुखद अन्त्य र अर्कोतिर नयाँ युगको सुनौलो सुरुवातको यो रोमाञ्चक संगमले जारी विश्वकपलाई फुटबल इतिहासकै एक अनौठो र स्मरणीय उत्सव बनाएको छ।