रौतहट। स्याङ्जाको वालिङ नगरपालिका–७ लभ्ली डाँडास्थित मिर्दि–चापाकोट सडक खण्डमा शुक्रबार एउटा डवल क्याप बलेरो जिप दुर्घटना हुँदा एक जनाको मृत्यु भएको छ भने २० जना घाइते भएका छन्।

ताप्केबाट वालिङतर्फ आउँदै गरेको जिप सडक छेउमा पल्टिएर दुर्घटना भएको हो। दुर्घटनामा परी वालिङ नगरपालिका वडा नं. ७ बस्ने २५ वर्षीय राजेन्द्र बिरकट्टाको ज्यान गएको प्रहरीले जनाएको छ।

क्षमताभन्दा बढी यात्रु बोकेको उक्त जिपमा कुल २२ जना सवार थिए। दुर्घटनामा घाइते भएका २० जनालाई तत्काल उद्धार गरी प्राथमिक स्वास्थ्य केन्द्र वालिङ पुर्‍याइएको थियो।

त्यहाँ सामान्य उपचार गरेपछि थप उपचारका लागि १७ जनालाई पोखरा र २ जनालाई बुटवल रिफर गरिएको छ। घाइतेमध्येका एक बालकको भने प्राथमिक स्वास्थ्य केन्द्र वालिङमै उपचार भइरहेको छ।

प्रहरीले जिप चालक वालिङ नगरपालिका–७ बस्ने २८ वर्षीय मीन बहादुर सारूलाई नियन्त्रणमा लिएको छ। दुर्घटनाको कारणबारे थप अनुसन्धान भइरहेको प्रहरीले जनाएको छ।