काठमाडौं। फिफा विश्वकप २०२६ मा आफ्नो साख जोगाउँदै साविक विजेता अर्जेन्टिनाले शानदार प्रदर्शनसहित नकआउट चरणमा प्रवेश गरेको छ।

आइतबार बिहान डालास स्टेडियममा सम्पन्न समूह चरणको आफ्नो अन्तिम खेलमा अर्जेन्टिनाले जोर्डनलाई ३–१ गोल अन्तरले पराजित गर्दै प्रतियोगितामा आफ्नो अपराजित यात्रालाई कायमै राखेको छ।

समूह चरणका खेलहरूमा अर्जेन्टिनाले सुरुदेखि नै विपक्षी टोलीहरूमाथि पूर्ण नियन्त्रण कायम राखेको थियो। यसअघि अर्जेन्टिनाले आफ्नो पहिलो खेलमा अल्जेरियालाई ३-० र दोस्रो खेलमा अष्ट्रियालाई २-० ले हराउँदै आफ्नो बलियो उपस्थिति जनाएको थियो। जोर्डनविरुद्धको खेलमा पनि अर्जेन्टिनाले त्यही लयलाई निरन्तरता दियो।

खेलको १९औं मिनेटमा जियोभानी लो सेल्सोले आकर्षक फ्रिकिकमार्फत गोल गर्दै अर्जेन्टिनालाई पहिलो अग्रता दिलाएका थिए। त्यसको केही समयपछि नै ३१औं मिनेटमा लाउटारो मार्टिनेजले पेनाल्टीमार्फत गोल गर्दै टोलीको अग्रतालाई दोब्बर बनाए।

पहिलो हाफमा २-० ले पछि परेको जोर्डनका लागि ५५औं मिनेटमा मुसा अल-तमारीले गोल गर्दै खेलमा फर्किने संकेत दिएका थिए।

तर, जोर्डनको त्यो प्रयास धेरै बेर टिकेन। दोस्रो हाफमा मैदान प्रवेश गरेका कप्तान लियोनल मेसीले खेलको ८०औं मिनेटमा गोल गर्दै टोलीको जित सुनिश्चित गरे।

मेसीको गोलसँगै जोर्डनको खेलमा फर्कने आशा समाप्त भयो र अर्जेन्टिनाले नकआउट चरणको यात्रा थप सहज बनायो। यस विजयसँगै अर्जेन्टिनाले साविक विजेताका रूपमा आफ्नो दाबेदारीलाई पुनः पुष्टि गरेको छ।