काठमाडौं। सभामुख डोलप्रसाद अर्यालले आदिकवि भानुभक्त आचार्यको योगदानलाई केवल स्मरण मात्र नगरी उनले देखाएको मार्गलाई आत्मसात् गर्दै नेपाली भाषा र साहित्यको विकासमा लाग्नुपर्ने बताएका छन्।

सोमबार काठमाडौँको कमलादीस्थित नेपाल प्रज्ञा-प्रतिष्ठानमा आयोजित २१३औँ भानु जयन्ती विशेष समारोहलाई सम्बोधन गर्दै सभामुख अर्यालले भानुभक्तको योगदान नेपाली समाज, भाषा र संस्कृतिका लागि ऐतिहासिक रहेको उल्लेख गरे।

उनले आजको दिन भानुभक्तलाई सम्झने मात्र नभई उनको योगदानलाई व्यवहारमा उतार्दै नेपाली भाषा र साहित्यलाई अझ समृद्ध बनाउने सङ्कल्प लिनुपर्नेमा जोड दिए। आधुनिक प्रविधि, विश्वव्यापी प्रतिस्पर्धा र बदलिँदो सामाजिक संरचनाबीच पनि आफ्नो भाषा, संस्कृति र साहित्यको संरक्षण गर्नु सबैको सामूहिक जिम्मेवारी भएको उनको भनाइ थियो।

सभामुख अर्यालले भने, “भानुभक्तले देखाएको सरलता, स्पष्टता र जनतासँगको निकटताको मार्ग आज पनि उत्तिकै सान्दर्भिक छ। हामीले युवा पुस्तालाई नेपाली भाषा र साहित्यप्रति आकर्षित गर्नुपर्छ। सिर्जनशीलता र नवप्रवर्तनलाई प्रोत्साहन गर्दै भानुभक्तका आदर्शलाई समयअनुकूल रूपान्तरण गरेर अघि बढ्नुपर्छ।”

उनले भानुभक्त आचार्यको लेखनले नेपाली भाषालाई घर-घरमा पुर्‍याउनुका साथै जनजनमा चेतना फैलाउने महत्त्वपूर्ण काम गरेको बताए। नेपाली भाषाले नेपालको सांस्कृतिक एकतालाई मजबुत बनाएको उल्लेख गर्दै उनले नेपालभित्र मात्र नभई विदेशमा रहेका नेपालीलाई समेत एउटै भावनात्मक सूत्रमा जोड्ने काम गरिरहेको स्पष्ट पारे।

भाषा केवल सञ्चारको माध्यम मात्र नभई मुलुकको पहिचान, संस्कृति र इतिहाससँग जोडिएको महत्त्वपूर्ण आधार भएको बताउँदै सभामुख अर्यालले नेपाली भाषा र साहित्यको संरक्षण तथा प्रवर्द्धनका लागि राज्य, साहित्यकार, शिक्षण संस्था र नयाँ पुस्ताको संयुक्त प्रयास आवश्यक रहेको औँल्याए।