काठमाडौं । अभिनेत्री खुसी दुबेको नयाँ वेब सिरिज ‘सर्भिस गर्ल’ स्ट्रिम भइसकेको छ। यसअघि सार्वजनिक भएको यस सिरिजको ट्रेलरलाई दर्शकहरूले निकै रुचाएका थिए। यस शोमा खुसीको ‘बोल्ड’ अवतार देखिएको छ।

टेलिभिजन र ओटीटी दुवै माध्यममा चर्चित खुसीलाई अग्रपङ्क्तिका अभिनेत्रीहरूमा गनिन्छ। उनी यतिबेला आफ्नो नयाँ शो ‘सर्भिस गर्ल’ को प्रचारप्रसार (प्रमोसन) मा व्यस्त छिन्।

‘बजुका प्राइम’ सँगको कुराकानीका क्रममा खुसीले बोल्ड दृश्यहरूमा अभिनय गर्दाको अनुभव सेयर गरेकी छन्। उनले भनिन्, ‘मेरो यस शोमा धेरै अन्तरङ्ग (इन्टिमेट) दृश्यहरू त छैनन्। तर, केही यस्ता दृश्यहरू थिए, जसलाई लिएर म केही असहज महसुस गरिरहेकी थिएँ।’

‘यद्यपि ती दृश्यहरू धेरै खुला (रिभिलिङ) भने थिएनन्। तर म ‘सर्भिस गर्ल’ को पोसाकमा थिएँ। त्यहाँ मैले ज्याकेट फुकाल्नुको पछाडि पनि एउटा उद्देश्य (इन्टेन्सन) थियो,’ उनले अगाडि थपिन्, ‘त्यस्ता दृश्यको छायाङ्कनका क्रममा शोका निर्देशकले मलाई निकै सहज (कम्फर्टेबल) महसुस गराउनुभयो। त्यसबेला कोठामा धेरै मानिसहरू रहँदैनथे, अरू सबै बाहिर जान्थे।’

उनका अनुसार दृश्य खिच्ने बेला कोठामा केवल निर्देशक, क्यामेरामेन (डीओपी) र उनी मात्र हुन्थे। ‘हामीले ती दृश्यहरूलाई कलात्मक (एस्थेटिक) रूपमा छायाङ्कन गर्ने र सम्भव भएसम्म यथार्थपरक (रियलिस्टिक) बनाउने कुरा सुनिश्चित गरेका थियौँ,’ उनले भनिन्।

कुराकानीका क्रममा खुसीलाई के कहिल्यै उनीमाथि दुर्व्यवहार भएको छ भनेर सोधिएको थियो। जवाफमा उनले सामाजिक सञ्जालमा प्रयोगकर्ताहरूबाट अश्लील सन्देशहरू आउने गरेको बताइन्। यद्यपि, उनी ‘कास्टिङ काउच’ (कामको बदलामा यौन शोषण) को सिकार हुनबाट भने बचेकी छन्। यस मामिलामा आफू भाग्यमानी रहेको उनको भनाइ छ।

बालकलाकारका रूपमा आफ्नो अभिनय यात्रा सुरु गरेकी खुसीले यसअघि ‘आशिकाना’, ‘सङ्गम’, ‘बा बहू और बेबी’ र ‘कसम से’ जस्ता चर्चित टेलिभिजन शोहरूमा काम गरिसकेकी छन्।