काठमाडौं । ट्रम्प प्रशासनले केही आप्रवासीहरूका लागि रोजगार गुमेपछि अमेरिकामा बसेर नयाँ काम वा नयाँ प्रायोजक (स्पोन्सर) खोज्न पाइने ६० दिनको छुट (ग्रेस पिरियड) अन्त्य गर्ने प्रस्ताव अघि सारेको छ।

यस प्रस्तावमा एच-१बी भिसामा कार्यरत दक्ष श्रमिकहरूसमेत समावेश छन्। बिहीबार अनलाइनमार्फत जारी गरिएको एक सरकारी सूचनामा सो जानकारी दिइएको हो।

समाचार एजेन्सी रोयटर्सका अनुसार अमेरिकी होमल्यान्ड सेक्युरिटी विभागले फेडरल रजिस्टरमा प्रकाशित गरेको प्रस्तावित नियम लागू भएमा एच-१बी र अन्य केही अस्थायी कार्य भिसावाहकहरूले रोजगारी समाप्त हुनासाथ अमेरिका छाड्नुपर्नेछ।

यस निर्णयबाट ठूलो सङ्ख्यामा विदेशी कर्मचारीहरूमा निर्भर रहेका ठूला अमेरिकी प्रविधि (टेक) कम्पनीहरूलाई गम्भीर धक्का लाग्न सक्ने अनुमान गरिएको छ।

जनवरी २०२५ मा सत्तामा फर्किएपछि राष्ट्रपति डोनाल्ड ट्रम्पका तर्फबाट कानूनी आप्रवासनलाई सीमित गर्ने यो पछिल्लो प्रयास हो। उनको प्रशासनले यसअघि दक्ष विदेशी कर्मचारीहरूका लागि भिसा शुल्क बढाउने कदमहरू पनि चालिसकेको छ।

यसबाहेक, नयाँ तालिम कार्यक्रम लागू गर्ने क्रममा विश्वभर रहेका अमेरिकी नियोगहरूमा आप्रवासी भिसाको अन्तर्वार्ता (अपोइन्टमेन्ट) माथि अस्थायी रोकसमेत लगाइएको छ।

होमल्यान्ड सेक्युरिटीले आफ्नो प्रस्तावमा यस परिवर्तनबाट प्रभावित कम्पनीहरूको कार्यसम्पादनमा केही असर पर्न सक्ने स्वीकार गरे तापनि ती पदहरूमा अमेरिकी नागरिकहरूलाई नै रोजगारी दिन सकिने जनाएको छ।