काठमाडौं । अजरबैजानका राष्ट्रपति इल्हाम अलियेभ टर्कीमा आयोजना गरिएको ओटीएस शिखर सम्मेलनमा निमन्त्रणा गरिएको भए तापनि सहभागी भएनन्।

समाचार एजेन्सी ‘रोयटर्स’ बाट प्राप्त जानकारी अनुसार, टर्की र अजरबैजानबीच क्षेत्रीय नीतिहरूलाई लिएर सहयोगी राष्ट्रहरूबीच तनाव बढिरहेको सङ्केत मिलेको छ।

विगत केही साताअघि टर्की र अजरबैजानको सम्बन्धमा त्यतिबेला तनाव बढेको थियो, जब टर्कीका केही अधिकारीहरूले विद्यालय पोसाकको नयाँ नियमअन्तर्गत हेडस्कार्फ अर्थात् हिजाबको प्रयोगमा प्रतिबन्ध लगाउने बाकुको निर्णयको आलोचना गरेका थिए।

दुवै देशबीच इजरायललाई लिएर पनि मतभेद रहेको छ। गाजा युद्धलाई लिएर टर्की इजरायलको कडा आलोचक रहँदै आएको छ भने अजरबैजानको इजरायलसँग बलियो सम्बन्ध रहेको छ।

यद्यपि, टर्कीका अधिकारीहरूले भने यो तनावलाई कम महत्त्व दिने प्रयास गरेका छन्।

भाषा, संस्कृति र आफ्ना जराहरूसँग जोडिएका देशहरूको यस शिखर सम्मेलनको शुक्रबार सुरुवात गर्दै टर्कीका राष्ट्रपति रेसेप तयिप एर्दोगानले एकताको सन्देश दिए।

अङ्कारामा भएको यस बैठकमा अजरबैजानको नाम नलिई एर्दोगानले भने, “हाम्रो परिवारको तस्बिरमा अलगाव, विभाजन वा टकरावका लागि कुनै ठाउँ छैन। हामी सबै एकै ठाउँमा छौँ, सँगै छौँ र अल्लाहले चाहेमा सधैँ भाइ भएर रहनेछौँ।”

शिखर सम्मेलनमा विदेशमन्त्री जेहुन बायरामोभले अजरबैजानको प्रतिनिधित्व गरेका थिए। एर्दोगानपछि बोल्दै उनले तनावको कुनै उल्लेख गरेनन् र आतिथ्यताका लागि टर्कीलाई धन्यवाद दिए।