काठमाडौं । युरोपेली सङ्घको नौसैनिक टोली र पुन्टल्यान्डका सुरक्षा अधिकारीहरूले शनिबार जनाए अनुसार हतियारधारी समुद्री डाकाहरूले सोमालियाको उत्तर-पूर्वी तट नजिकै माछा मार्ने एक इरानी डुङ्गा अपहरण गरेका छन्।

‘रोयटर्स’ का अनुसार सोमालियाको तटमा समुद्री डकैतीका घटनाहरू पुनः बढेका छन्। अप्रिलयता कम्तीमा १५ वटा आक्रमण दर्ता भइसकेका छन्, जुन सन् २०१३ पछिको सबैभन्दा उच्च सङ्ख्या हो।

सोमालियाको उत्तर-पूर्वमा अवस्थित पुन्टल्यान्ड एक अर्ध-स्वायत्त क्षेत्र हो।

हिन्द महासागरमा युरोपेली सङ्घको समुद्री सुरक्षा केन्द्रद्वारा जारी चेतावनी (अलर्ट) अनुसार ‘अजिनी’ नामको डुङ्गालाई अक्टोबर २९ मा बिहान ९ बजे (जीएमटी) सोमालियाको तट नजिकै अपहरण गरिएको थियो। यो घटना पुन्टल्यान्डको बन्दर बिला र हाफुन तटीय सहरहरूको बीचमा भएको हो।

पुन्टल्यान्डका सुरक्षा अधिकारीहरूले ‘एएफपी’ लाई डुङ्गा अपहरण भएको पुष्टि गरेका छन्। उनीहरूका अनुसार आठजना हतियारधारी मानिसहरूले बेइला बन्दरगाह नजिकैको एक दूरदराज तटीय क्षेत्रबाट आक्रमण गरेका थिए।

एक सुरक्षा अधिकारीले भने, ‘जहाजमा सोमालियाका दुईजना सुरक्षाकर्मी उपस्थित थिए, तर समुद्री डाकाहरूको सङ्ख्या उनीहरूभन्दा बढी भएकाले उनीहरू सुरक्षाकर्मीहरूलाई नियन्त्रणमा लिन सफल भए।’

उनले थपे, ‘उनीहरू तट नजिकै माछा मारिरहेका थिए, त्यसैले उनीहरू अपहरणको उच्च जोखिममा थिए।’