काठमाडौं । इस्ताम्बुलबाट ट्युनिसियातर्फ जाँदै गरेको टर्किस एयरलाइन्सको एक उडानमा अवतरणका क्रममा विमान भीषण आँधी र खतरनाक टर्बुलन्समा फसेपछि आतङ्क मच्चिएको छ।

विमान ट्युनिस-कार्थेज इन्टरनेसनल एयरपोर्टमा अवतरण हुनुपर्ने थियो, तर खराब मौसमका कारण ल्यान्डिङ अत्यन्तै कठिन बनेको थियो। विमान पटक-पटक तीव्र रूपमा हल्लिँदा यात्रुहरूमा त्रास फैलिएको थियो र कैयौँ मानिसहरू चिच्याउन थालेका थिए।

यो घटना सेप्टेम्बर १० को बताइएको छ। उडानमा आफ्नी आमासँगै यात्रा गरिरहेकी यात्रु मारिना म्यास्कायाले सामाजिक सञ्जालमा यस घटनाको भिडियो शेयर गरेकी छन्। भिडियोमा यात्रुहरूले आफ्ना सिटहरू समातेको देखिन्छ भने विमान तीव्र रूपमा हल्लिँदा केबिनभित्र चिच्याहट सुनिएको छ। यसैबीच यात्रुहरूले विमान केही सेकेन्डका लागि ‘फ्री फल’ मा जस्तै तल खस्न थालेको बताएका छन्।

मारिना म्यास्कायाका अनुसार उडानका क्रममा सबै कुरा सामान्य थियो र समस्या विमान तल झर्ने क्रममा सुरु भएको थियो। उनले आँधीबीच पाइलटले ट्युनिस-कार्थेज एयरपोर्टमा अवतरण गर्ने तीन पटक प्रयास गरेको बताइन्। उनका अनुसार प्रत्येक प्रयासका क्रममा विमान गम्भीर रूपमा हल्लिरहेको थियो। तेस्रो प्रयासका क्रममा स्थिति अझ भयावह बन्यो र उनीहरूलाई विमान अचानक तल खसिरहेको महसुस भयो। त्यस समयमा यात्रुहरूबीच रुवाबासी र चीत्कार मच्चिएको उनले बताइन्।

खराब मौसमका कारण विमानले सोही क्षेत्रमाथि चक्कर लगाउनु पनि परेको थियो। जब ट्युनिस-कार्थेज एयरपोर्टमा अवतरण सम्भव भएन, तब विमानलाई अर्को एयरपोर्टतर्फ मोड्ने (डाइभर्ट गर्ने) निर्णय गरियो।

उडानलाई अन्ततः ट्युनिसबाट करिब ६० माइल दक्षिणमा अवस्थित एनफिधा-हम्मामेट इन्टरनेसनल एयरपोर्टतर्फ मोडिएको थियो। त्यहाँ विमानले सुरक्षित अवतरण गर्‍यो। यस घटनामा कुनै पनि यात्रु घाइते भएको खबर छैन। यद्यपि, अवतरणका क्रममा भएको तीव्र टर्बुलन्स, खराब मौसम र पटक-पटक असफल भएका अवतरणका प्रयासहरूले विमानमा सवार यात्रुहरूका लागि यो यात्रालाई अत्यन्तै डरलाग्दो बनाएका थिए।