काठमाडौं।  न्याय परिषद्को बैठकले सर्वोच्च अदालतका रजिष्ट्रार भद्रकाली पोखरेलसहित तीन जनालाई उच्च अदालतको न्यायाधीश पदमा सिफारिस गरेको छ।

प्रधानन्यायाधीश डा. मनोज शर्माको अध्यक्षतामा मंगलबार बसेको परिषद् बैठकले सर्वोच्चका रजिष्ट्रार पोखरेल, जिल्ला न्यायाधीश हिमलाल बेलबासे र फैसला कार्यान्वयन निर्देशनालयका महानिर्देशक गजेन्द्र बहादुर सिंहलाई उच्च अदालतको न्यायाधीशमा सिफारिस गर्ने निर्णय गरेको हो।

यसैगरी, मंगलबार नै बसेको न्याय सेवा आयोगको बैठकले सर्वोच्च अदालतका दुई जना सहरजिष्ट्रारलाई रजिष्ट्रार पदमा बढुवा गर्न सिफारिस गरेको छ।

आयोगको निर्णयअनुसार सहरजिष्ट्रारद्वय ठगिन्द्र कट्टेल र बाबुराम दाहाल रजिष्ट्रार पदमा बढुवाका लागि सिफारिस भएका हुन्।

न्याय प्रशासनलाई थप सुदृढ र प्रभावकारी बनाउने उद्देश्यका साथ परिषद् र आयोगले प्रशासनिक तथा न्यायिक पदहरूमा यी सिफारिस तथा बढुवाका निर्णयहरू गरेका हुन्।