टाेकियाे। शक्तिशाली ताइफुन ‘दुजुआन’का कारण जापानमा कम्तीमा दुई जनाको ज्यान गएको छ भने पाँच जना घाइते भएका छन्।

भीषण वर्षा र पहिरोका कारण राजधानी टोकियो र आसपासका क्षेत्रको जनजीवन नराम्ररी प्रभावित हुनुका साथै ४६ हजारभन्दा बढी घरधुरीमा विद्युत् आपूर्ति पूर्ण रूपमा ठप्प भएको छ।

जापानको अग्नि तथा विपद् व्यवस्थापन निकायका अनुसार टोकियो नजिकैको कानागावा र चिबा प्रिफेक्चरमा एक-एक जनाको मृत्यु भएको छ। मुसलधारे वर्षापछि गएको पहिरोमा परी बेपत्ता भएका चार जनाको खोजी तथा उद्धार कार्य तीव्रताका साथ जारी रहेको सार्वजनिक प्रसारण संस्था एनएचकेले जनाएको छ।

मंगलबार बिहानसम्ममा यो ताइफुन जापानको तटीय क्षेत्र छाडेर प्रशान्त महासागरतर्फ मोडिएपछि अधिकारीहरूले भारी वर्षा र पहिरोको जोखिमबारे जारी गरेका अधिकांश चेतावनीहरू भने हटाएका छन्।

ताइफुन कमजोर हुँदै उत्तरपूर्वतर्फ अघि बढे पनि टोकियो क्षेत्रका विभिन्न स्थानमा कीर्तिमानी वर्षा मापन गरिएको छ। टोकियोबाट करिब १२० किलोमिटर दक्षिणमा रहेको ओशिमा द्वीपमा ४८ घण्टाभित्र ८३२ मिलिमिटर वर्षा भएको छ, जुन सेप्टेम्बर महिनाको औसत वर्षाभन्दा दोब्बरभन्दा बढी हो। त्यसैगरी टोकियोकै एडोगावा वार्डमा २४ घण्टाभित्र २८२.५ मिलिमिटर वर्षा दर्ता गरिएको छ, जुन त्यहाँको सर्वकालिक नयाँ रेकर्ड हो।

विपद्का कारण राजधानी टोकियोमा आयोजना भइरहेको विश्वकै ठूला भिडियो गेम व्यापार मेला निर्धारित समयभन्दा अगावै बन्द गरिएको थियो भने जारी एसियाली खेलकुदका केही प्रतिस्पर्धाहरू समेत प्रभावित बनेका छन्।

जापानमा गर्मीयामको अन्त्यदेखि शरद ऋतुको सुरुवातसम्म यस्ता शक्तिशाली ताइफुन आउने गर्छन्। वैज्ञानिकहरूका अनुसार जलवायु परिवर्तन र बढ्दो विश्वव्यापी तापक्रमका कारण वायुमण्डलले बढी जलवाष्प धारण गर्ने भएकाले यस्ता भारी वर्षा र प्राकृतिक विपद्को जोखिम दिनानुदिन बढ्दै गइरहेको छ।