काठमाडौं । मेक्सिकोको सिनालोआ राज्यस्थित एक जेलमा बिहीबार भएको भीषण दङ्गामा परी कम्तीमा १० जनाको मृत्यु भएको छ भने अन्य १६ जना घाइते भएका छन्।

सुरक्षा अधिकारीहरूका अनुसार मृत्यु हुनेहरूमा कैदीलाई भेट्न आएका एक सर्वसाधारण व्यक्ति रहेका छन् भने बाँकी नौ जना कैदी नै रहेका छन्।

जेलभित्र हिंसा भड्किएपछि स्थिति नियन्त्रणमा लिनका लागि नेसनल गार्ड का जवानहरू तैनाथ गरिएको थियो। सेना र सुरक्षाकर्मीको हस्तक्षेपपछि हाल स्थिति नियन्त्रणमा आएको बताइएको छ।

यद्यपि, यो दङ्गा कुन कारणले र कसरी सुरु भयो भन्ने कुरा अझै स्पष्ट भइसकेको छैन।

उल्लेखनीय छ कि सिनालोआलाई मेक्सिकोकै सबैभन्दा खतरनाक र असुरक्षित राज्यहरूमध्ये एक मानिन्छ। यो क्षेत्र कुख्यात ‘सिनालोआ ड्रग कार्टेल’ को मुख्य गढसमेत हो।