काठमाडौं । नेपाली कांग्रेसको १५औँ महाधिवेशनअन्तर्गत नयाँ नेतृत्व चयनका लागि भइरहेको मतगणनामा समावेशी उपसभापति पदतर्फ उद्योगपति विनोद चौधरीले अग्रता लिएका छन्।

हालसम्मको मतपरिणामअनुसार चौधरीले २६३ मत प्राप्त गरेका छन्। उनका प्रतिस्पर्धी जीवन परियारले २०५ मत प्राप्त गरेका छन् भने फरमुल्लाह मंसुरले १२७ मत पाएका छन्।

त्यस्तै, सीता गुरुङले १०७ मत प्राप्त गर्दा रञ्जित कर्णले ७५ मत पाएका छन्। हालसम्म १ हजार ३३० मत गणना हुँदा ५ मत बदर भएको छ।

नेपाली कांग्रेसको १५औँ महाधिवेशनअन्तर्गत उपसभापति र महामन्त्री पदको मतगणना जारी छ। मतगणना जारी रहेकाले समावेशी उपसभापति पदको अन्तिम नतिजा आउन बाँकी छ।