काठमाडौं । अमेरिकी राष्ट्रपति डोनाल्ड ट्रम्पले रूस र युक्रेनबिच तत्कालै लागू हुने गरी ‘ऊर्जा युद्धविराम’को घोषणा गरेको भोलिपल्टै रूसले युक्रेनका छवटा प्रमुख ऊर्जा पूर्वाधारहरूमाथि घातक हवाई आक्रमण गरेको छ।

युक्रेनी राष्ट्रपति भोलोडिमिर जेलेन्स्कीले सोमबार रूसले ग्यास संयन्त्र र पेट्रोल स्टेसनसहित कम्तीमा ६ वटा ऊर्जा केन्द्रहरूमा ड्रोन तथा मिसाइल प्रहार गरेको जानकारी दिएका छन्।

जेलेन्स्कीका अनुसार यी श्रृङ्खलाबद्ध प्रहारहरूले के स्पष्ट पार्छ भने मस्को वासिङ्टनद्वारा प्रस्तावित ऊर्जा युद्धविरामको पालना गर्न र आक्रमण रोक्न पटक्कै इच्छुक छैन। सामाजिक सञ्जाल एक्स (ट्विटर) मा लेख्दै जेलेन्स्कीले भने, “रूस अमेरिकाले प्रस्ताव गरेको ऊर्जा युद्धविराम स्वीकार गर्न तयार छैन र हाम्रा जनतामाथि आतङ्ककारी हवाई आक्रमण जारी राख्न चाहन्छ भन्ने कुरा झन् स्पष्ट भएको छ। रूसले आफ्नो युद्ध मेसिनरीबाट अझ बढी नाफा कमाउने सम्भावना देखेपछि यस्तो व्यवहार देखाउँछ।”

पोल्यान्डमा आयोजित एक सम्मेलनमा भिडियो लिङ्कमार्फत सम्बोधन गर्दै जेलेन्स्कीले यदि मस्को ६० दिने पूर्ण युद्धविरामका लागि सहमत हुन्छ भने युक्रेनमा युद्धका कारण स्थगित गरिएका राष्ट्रपतीय चुनाव गराउन सकिने ठुलो प्रस्ताव अघि सारेका छन्।

ट्रम्पले आगामी अमेरिकी ‘मिड-टर्म’ चुनावअघि ऊर्जाको बढ्दो मूल्य नियन्त्रण गर्न रूसबाट डिजेल खरिद गर्ने सम्झौता गरेलगत्तै यो युद्धविरामको घोषणा गरेका थिए। जेलेन्स्कीले यस सम्झौताको कडा आलोचना गर्दै यसले मस्कोको अर्थतन्त्रलाई एक्ल्याउने पश्चिमा नीतिलाई कमजोर बनाएको बताएका छन्।

सोमबार युरोपेली युनियनले सन् २०२२ को पूर्ण सैन्य आक्रमणयताकै सबैभन्दा ठुलो र कडा प्रतिबन्ध स्वीकृत गरेको छ। यसअन्तर्गत रूसी सैन्य-औद्योगिक क्षेत्रसँग जोडिएका १,५०० भन्दा बढी व्यक्ति तथा संस्थाहरूलाई कालोसूचीमा राखिएको छ।

युरोपेली युनियनकी विदेश नीति प्रमुख काजा कलासले रूसले कहिल्यै पनि यस्ता युद्धविरामका सम्झौताहरू पालना नगर्ने भन्दै केवल ऊर्जा संरचना मात्र नभई आम नागरिकको ज्यान जोगाउने गरी पूर्ण युद्धविराम हुनुपर्नेमा जोड दिएकी छन्।

क्रेमलिनका प्रवक्ता दिमित्री पेस्कोभले सम्भावित ऊर्जा युद्धविरामबारे छलफल अझै जारी रहेको बताएका छन्। उनले यसबारे थप विवरण सही समयमा दिइने स्पष्ट पारे पनि जेलेन्स्कीले राखेको ६० दिने पूर्ण युद्धविराम र चुनाव गराउने प्रस्तावलाई भने क्रेमलिनले सिधै खारेज गरिदिएको छ।