यमनका इरान समर्थित हुथी विद्रोहीहरूले साउदी अरेबियाका नागरिक विमानस्थल र पूर्वाधारहरूमाथि शृङ्खलाबद्ध घातक आक्रमण जारी राखेपछि भारतीय उड्डयन कम्पनीहरूले साउदी अरेबियातर्फका आफ्ना सम्पूर्ण उडानहरू अक्टोबर १७, २०२६ सम्मका लागि रद्द गरेका छन्।

भारतीय बजेट एयरलाइन्स इन्डिगोले ट्राभल एडभाजरी जारी गर्दै साउदीका मुख्य सहरहरू रियाद, जेद्दा, दमाम र मदिना का लागि र त्यहाँबाट हुने सबै नियमित उडानहरू अक्टोबर १७ सम्मका लागि स्थगित गरिएको जनाएको छ। त्यसै गरी, अकासा एयर (Akasa Air) र एयर इन्डियाले पनि रियाद र जेद्दाका आफ्ना सम्पूर्ण उडानहरू रद्द गर्ने निर्णय गरेका छन्।

एयरलाइन्सहरूले साउदी अरेबिया यात्रा गर्ने तयारीमा रहेका यात्रुहरूलाई विमानस्थलका लागि प्रस्थान गर्नुअघि अनिवार्य रूपमा आफ्नो उडानको पछिल्लो स्थिति जाँच गर्न अपिल गरेका छन्।

प्रभावित यात्रुहरूलाई नि:शुल्क उडान तालिका परिवर्तन वा पूरा रकम फिर्ता को सुविधा प्रदान गरिएको छ। एयरलाइन्सहरूले आफ्ना यात्रु र उडान टोलीको सुरक्षा नै सर्वोपरि रहेको र साउदी अरेबिया तथा भारतका सम्बन्धित नागरिक उड्डयन निकायहरूसँग निरन्तर समन्वय गरिरहेको बताएका छन्।

सन् २०२२ को युद्धविराम भङ्ग भई गत जुलाईदेखि साउदी अरेबिया र हुथी विद्रोहीहरूबिच पुनः द्वन्द्व चर्किएपछि हुथीहरूले साउदीका नागरिक क्षेत्रहरूमा सयौँ ड्रोन र मिसाइल प्रहार गरिसकेका छन्।

रियादस्थित किङ खालिद अन्तर्राष्ट्रिय विमानस्थलमा भएको घातक मिसाइल प्रहारमा १ भारतीय र १ अमेरिकी नागरिकसहित १३ जनाको मृत्यु हुनुका साथै ३०० भन्दा बढी मानिसहरू घाइते भएपछि सुरक्षा जोखिम उच्च बनेको हो।

भारतका इन्डिगो, एयर इन्डिया र अकासा एयरका अतिरिक्त जर्मनीको लुफ्थान्सा, क्याथे प्यासिफिक र फिलिपिन्स एयरलाइन्स जस्ता प्रमुख अन्तर्राष्ट्रिय विमान कम्पनीहरूले पनि रियाद तथा साउदीका अन्य सहरहरूमा हुने आफ्ना उडानहरू स्थगित गरेका छन्।