काठमाडौं । युक्रेनका राष्ट्रपति भोलोडिमिर जेलेन्स्कीले रूसले रातभर राजधानी किभ र दोस्रो ठुलो सहर खार्किभ का प्रमुख ऊर्जा तथा अति संवेदनशील पूर्वाधारहरूलाई निशाना बनाएर भीषण हवाई आक्रमण गरेको बताएका छन्।

जेलेन्स्कीका अनुसार रुसी सेनाले ३९ वटा ब्यालिस्टिक मिसाइल र १२० भन्दा बढी आक्रमणकारी ड्रोन का साथै अन्य घातक हतियारहरू प्रयोग गरी ठुलो परिमाणमा आक्रमण गरेको हो। अमेरिकी राष्ट्रपति डोनाल्ड ट्रम्पले दुवै देशबिच ‘ऊर्जा युद्धविराम’ को घोषणा गरेकै समयमा मस्कोले यो भयानक आक्रमण गरेको हो।

सामाजिक सञ्जाल एक्स (ट्विटर) मा एक पोस्ट शेयर गर्दै राष्ट्रपति जेलेन्स्कीले अमेरिकाको मध्यस्थतामा भएको युद्धविरामको रूसले खुला उल्लङ्घन गरेको आरोप लगाएका छन् ।

जेलेन्स्कीले लेखेका छन्, ‘रूसले अमेरिकी राष्ट्रपतिद्वारा घोषित युद्धविरामको दायराभित्र परेका ऊर्जा पूर्वाधारहरूलाई नै निशाना बनाएर ब्यालिस्टिक मिसाइल प्रहार गर्‍यो। यो आक्रमण पूर्ण रूपमा योजनाबद्ध र अत्यन्तै ठुलो मात्रामा गरिएको थियो। रूसले यसअघि कहिल्यै पनि अमेरिकाप्रति यति खुला र स्पष्ट अवहेलना देखाएको थिएन।’

आक्रमणका कारण कम्तीमा ६ लाख नागरिकहरू बिजुलीविहीन बनेका छन् र यो सङ्ख्या अझै बढ्न सक्ने चेतावनी दिइएको छ। युक्रेनको ऊर्जा क्षेत्रका २६ वटा र तेल तथा ग्यास क्षेत्रका ४ वटा गरी जम्मा ३० वटा पूर्वाधार तथा उपकरणहरूमा गम्भीर क्षति पुगेको छ।

जेलेन्स्कीले अमेरिका, युरोप र अन्य विश्वव्यापी सहयोगी राष्ट्रहरूसँग जोडदार अपिल गर्दै भनेका छन्, ‘संसारको कुनै पनि देशलाई रूसजस्तो युद्धप्रेमी र आतङ्ककारी मुलुकको एक्लै सामना गर्नका लागि अलपत्र छाडिनु हुँदैन। हाम्रा सहयोगीहरूले रूसको यस कदमको कडा र ठोस जवाफ दिनुपर्छ।’

यो घटनाले अमेरिकाले दाबी गरेको ‘ऊर्जा युद्धविराम’ पूर्ण रूपमा विफल भएको र मस्को-वासिङ्टनबिचको कूटनीतिक संवाद थप जटिल मोडमा पुगेको सङ्केत गरेको छ।