भोजपुर।  बडादशैं नजिकिएसँगै भोजपुरका ग्रामीण बस्तीहरूमा चाडपर्वको बेग्लै रौनक र उत्साह छाएको छ। अध्ययन, रोजगारी तथा अन्य विभिन्न सिलसिलामा घरबाहिर रहेका आफन्त र परिवारका सदस्यहरू गाउँ फर्किन थालेपछि गाउँघरमा खुसी र उमङ्ग भरिएको छ। घटस्थापनादेखि नै सुरु भएको दशैंको माहोलले भेटघाट, पूजाआजा र पारिवारिक मिलनको वातावरण सिर्जना गरेको छ।

भोजपुरको ग्रामीण परिवेशमा दसैँलाई पारिवारिक पुनर्मिलन र मौलिक सांस्कृतिक परम्परा जोगाउने महत्त्वपूर्ण अवसरका रूपमा लिइन्छ। दसैँ नजिकिएसँगै घरहरू लिपपोत गर्ने, बाटोघाटो तथा चौतारा सफा गर्ने, लिङ्गे तथा रोटे पिङ हाल्ने र स्थानीय मठमन्दिरहरूमा पूजाआजा गर्ने कार्य तीव्र रूपमा भइरहेको छ। यसका साथै चाडपर्वका अवसरमा आयोजना गरिने स्थानीय खेलकुद तथा सांस्कृतिक कार्यक्रमहरूले पनि गाउँघरको रौनक अझ बढाएका छन्।

वर्षभरिको काम र व्यस्ततालाई थाती राख्दै परिवारका सदस्यहरू एकै ठाउँमा भेला भई सुखदुःख साटासाट गर्ने, मीठोमसिनो खाने र मान्यजनको हातबाट टीका तथा जमरा ग्रहण गर्ने तयारीमा जुटेका छन्। विशेष गरी वैदेशिक रोजगारी वा देशका प्रमुख सहरहरूमा अध्ययनरत युवा पुस्ता गाउँ फर्किएपछि घरपरिवारसँग समय बिताउने र रमाइलो गर्ने वातावरण बनेको छ।

यस्तै, चाडपर्व लक्षित किनमेलका कारण भोजपुरका मुख्य बजारहरूमा सर्वसाधारणको ठूलो चहलपहल देखिएको छ। लत्ताकपडा, खाद्यान्न, जुत्ताचप्पल, फलफूल तथा पूजासामग्री खरिदका लागि मानिसहरूको बाक्लो उपस्थिति रहेको छ। सदरमुकाम भोजपुर बजारसहित दिङ्ला, घोडेटार, प्याउलीलगायतका मुख्य व्यापारिक केन्द्रहरूमा किनमेल गर्नेहरूको भीड लागेको छ।

दसैँले स्थानीय कृषि उपज र पशुपालनको बजारीकरणमा समेत ठूलो टेवा पुर्‍याएको छ। गाउँघरमा उत्पादन गरिएका खसीबोका, स्थानीय कुखुरा, सागपात तथा फलफूलको माग अत्यधिक बढेको टेम्केमैयुङ गाउँपालिका-५ का किसान देवबहादुर विष्टले बताए। चाडपर्वका बेला स्थानीय उत्पादनको खपत बढ्दा किसानहरूलाई राम्रो आम्दानी गर्ने अवसर मिलेको उनको भनाइ छ।

दशैंका क्रममा जिल्लाका प्रसिद्ध शक्तिपीठ तथा धार्मिक स्थलहरूमा भक्तजनको पूजाआजा र दर्शन गर्ने परम्परा कायमै छ।

आधुनिक जीवनशैली र वैदेशिक रोजगारीका कारण युवा पुस्ता बाहिरिँदा चाडपर्व मनाउने केही परम्परागत शैलीमा परिवर्तन आए पनि यसले पुराना पुस्ताबाट नयाँ पुस्तामा संस्कृति र संस्कार हस्तान्तरण गर्ने महत्त्वपूर्ण भूमिका खेलेको छ। पारिवारिक पुनर्मिलन, सांस्कृतिक निरन्तरता र सामाजिक सद्भाव बढाउँदै दसैँले भोजपुरका गाउँबस्तीहरूमा आत्मीयता थपेको छ।