काठमाडौं। नेपाल प्रिमियर लिग (एनपीएल) को तेस्रो संस्करणको विजेता टिमले १ करोड ५० लाख रुपैयाँ पुरस्कार पाउने भएको छ। नेपाल क्रिकेट सङ्घ (क्यान) ले आइतबार एक पत्रकार सम्मेलनको आयोजना गर्दै प्रतियोगिताको पुरस्कार राशिबारे औपचारिक जानकारी गराएको हो।

क्यानले घोषणा गरे अनुसार एनपीएलको यस तेस्रो संस्करणमा उपविजेता बन्ने टोलीले ८० लाख रुपैयाँ नगद प्राप्त गर्नेछ। त्यसैगरी, प्रतियोगितामा तेस्रो स्थान हासिल गर्ने टोलीले ४० लाख र चौथो स्थानमा रहने टोलीले ३० लाख रुपैयाँ पुरस्कार पाउने भएका छन्।

यसअघि आयोजित एनपीएलको दोस्रो संस्करणमा विजेता टोलीलाई १ करोड १० लाख रुपैयाँ पुरस्कार प्रदान गरिएको थियो भने उपविजेताले ५१ लाख रुपैयाँ मात्र पाएका थिए।

त्यस्तै, गत संस्करणमा तेस्रो हुने टोलीले २५ लाख र चौथो स्थान हासिल गर्ने टोलीले १५ लाख रुपैयाँ नगद प्राप्त गरेका थिए। यसपटक क्यानले पुरस्कार राशिमा उल्लेख्य वृद्धि गर्दै प्रतियोगितालाई थप आकर्षक र प्रतिस्पर्धी बनाएको छ।