क्लिन्टन (रासस/एएफपी) । आगामी नोभेम्बरको अमेरिकी राष्ट्रपतीय चुनावमा डोनाल्ड ट्रम्पलाई चुनौती दिने उद्देश्यले डेमोक्र्याटिक पार्टीका तर्फबाट उम्मेदवार हुन चाहनेहरू आयोवा राज्यमा केन्द्रित भएका छन् । खासगरी आयोवा राज्यबाट पहिलो चुनावी अभियान शुरु हुने लागेकाले पनि सबैको ध्यान आयोवातर्फ केन्द्रित भएको हो । अमेरिकी राष्ट्रपतिको उम्मेदवार हुन चाहने चार जना सिनेटर सोमबार राष्ट्रपति ट्रम्पविरुद्धको महाभियोगसम्बन्धी बहसबाट विश्राम लिएर आयोवामा चुनावी प्रचारमा जुटेका छन् ।

अमेरिकी माथिल्लो सदन सिनेटले ट्रम्पविरुद्ध डेमोक्र्याटिक पार्टीले ल्याएको “शक्तिको दुरूपयोग र न्यायमा अवरोध” सम्बन्धी महाभियोगमा पर्याप्त आधार प्रमाण नरहेको जनाएसँगै डेमोक्र्याटिक पार्टीका तर्फका सबै सिनेटरहरू अन्तिम मिनेटको चुनावी प्रचार अभियानका लागि आयोवा पुगेका हुन् । चुनावी सर्वेक्षणले डेमोक्र्याटिक उम्मेदवारहरूबीच राज्यमा कडा प्रतिस्पर्धा हुने देखाएको छ । मुख्य प्रतिस्पर्धी ठानिएका पूर्वउपराष्ट्रपति जो बाइडेनले यसै साता राज्यका कुनाकाप्चासम्म बसयात्रा सम्पन्न गरेका छन् । उनी आयोवा राज्यमा शीर्ष स्थान हासिल गर्न सके अन्य राज्यमा चुनावी नतिजा आफ्नो पक्षमा पार्नसक्ने सोचाइमा छन्।

इन्डियानाका पूर्वमेयर पिट बुटिगीग पनि जो बाइडेन झैं गल्ली गल्लीमा दौडिरहेका छन् । बुटिगीग अहिले ७७ वर्षीय बाइडेनलाई उठाएर जोखिम मोल्ने समय होइन भन्दै पार्टीका सदस्य मतदातालाई आफूतिर आकर्षित गर्न कम्मर कसेर लागेका छन् । बाइडेनभन्दा झण्डै आधा उमेरका ३८ वर्षीय बुटिगीगले आयोवाको क्लिन्टन शहरस्थित मासोनिक टेम्पलमा शुक्रबार ठूलै जनसमूहलाई सम्बोधन गर्दै भने, “मेरो तर्क छ, अहिले पुराना र उमेर ढल्केका व्यक्तिलाई उठाएर जोखिम लिने समय होइन ।”

नोभेम्बरको चुनावमा ट्रम्पलाई कसले चुनौती दिन्छ भनेर अहिल्यै आँकलन गर्न कठिन छ, तर पार्टीभित्र न्यून समर्थन प्राप्त गर्नेहरू सोमबार रातिको मतपरिणामसँगै बाहिरिन थाल्नेछन् । पूर्वसांसद जोन डेलानीले शुक्रबार नै उम्मेदवारी त्यागेको घोषणा गरिसकेका छन् । अद्यपी अझै ११ जना उम्मेदवारहरू यस दौडमा रहेका छन् र धेरैले आयोवाका मतदातालाई आकर्षित गर्न र विजयी हुन खोजिरहेका छन् । यस चुनावमा राम्रो नतिजाका साथ आगामी फेब्रुअरी ११ मा न्यू ह्याम्पशायरमा हुने दोस्रो चुनावी प्रतिस्पर्धामा भाग लिने सबै उम्मेदवारको चाहना छ ।

मतसर्वेक्षणमा आयोवामा बाइडेन र बुटिगीगभन्दा झिनो मतान्तरले अगाडि रहेको सिनेटर बर्नी स्यान्डर्स, चौथो स्थानकी प्रगतिशील सेनेटर एलिजाबेथ वारेन र पाँचौं स्थानकी सिनेटर एमी क्लोबुचरले अन्तिम क्षणको चुनावी प्रचारलाई तीव्र बनाएका छन् । दुई सातादेखि चुनावी दौडमा सिनेटरहरू प्रचारमा लागेका छन्, तर सिनेटमा महाभियोगको बहसका कारण उनीहरूका हात बाँधिएका थिए । उनीहरूको पक्षबाट चुनावी प्रचारमा परिवारका सदस्य, आफन्त र पार्टीका अरु सदस्य एवं सांसदहरू खटिएका छन् । तीमध्ये एक हुन् ७८ वर्षे बर्नी स्यान्डर्स । उनी डेमोक्र्याटिक पार्टीका तर्फबाट सबैभन्दा पाका उमेरका उम्मेदवार हुन्, तर युवा पुस्ताको सर्वाधिक समर्थन उनलाई नै रहेको देखिएको छ ।

डेस मोइन्स नजिक शुक्रबार इन्डी रक ब्यान्ड बोन आइभरले साङ्गीतिक प्रस्तुति नै दिएको छ । तर त्यस कार्यक्रममा स्यान्डर्स उपस्थित हुन सकेनन् । वाशिङ्टनबाटै फोन गरी उनले आफ्नो पक्षमा चुनावी नतिजा ल्याउन “सकेजति कार्य गर्न” आग्रह गरेका थिए । उनी शनिबार सेडान ¥यापिड्समा भम्पायर विकिन्डको उपस्थितिमा यस्तै कार्यक्रम गर्दै छन् ।

अर्की उम्मेदवार वारेन पनि डेस मोइन्स शुक्रबार मात्र आइपुगिन् । क्लोबुचार पनि शनिबार यस्तै कार्यक्रमहरूमा व्यस्त रहने कार्यक्रम छ । आयोवा राज्यका डेमोक्र्याटिक पार्टी आबद्ध मतदातामध्ये झण्डै आधाले आफूहरू अझै दोधारमा रहेको बताएका छन् । तीमध्येकी २१ वर्षीया विद्यार्थी स्टेफानी हल पनि छन् । उनी बर्लिङटनमा जो बाइडेनलाई भेट्न आएकी हुन् । उनले भनिन्, ‘यस पटक जो बाइडेनलाई मतदान गर्ने सोचमा छु । तर मलाई मनपर्ने अरु केही उम्मेदवार पनि हुनुहुन्छ, त्यसैले अहिल्यै केही भन्न सक्दिँन ।’

डेमोक्र्याटिक पार्टीका उम्मेदवारमध्ये विदेश नीतिमा सर्वाधिक अनुभवी जो बाइडेन नै हुन् । उनी ट्रम्पका विदेश नीतिहरूका कारण अमेरिका नै खतरामा परेको दाबी गर्दै आएका छन् । बाइडेनले एक चुनावी सभामा भने, ‘संयुक्तराज्य अमेरिकाको भाबी राष्ट्रपतिले विभाजित मुलुक प्राप्त गर्नेछ, र विश्व अति अव्यवस्थित हुनेछ । ’ तर उनका आयोवाका भाषणहरू प्रतिद्वन्द्वीहरूलाई चुप लगाउन सक्ने किसिमका थिएनन् । सन् २०२० को चुनावमा क्रान्ति वा यथार्थवादमध्ये कुन राजनीतिक दृष्टिकोण लिनु पर्दछ भन्ने कुरामा अझै विवादित छन् । आयोवाकी डेमोक्र्याटिक पार्टी अध्यक्ष ट्रोय प्राइसले मतदाताहरू एक लक्ष्यको वरिपरि एकजुट भइसकेको बताइन् । “सबैको एउटै ध्येय र उद्देश्य छ, डोनाल्ड ट्रम्पलाई हराऔँ,“ प्राइसले बताइन् ।

सेवानिवृत्त ६९ वर्षीय शिक्षक प्याट कारले बुटिगीग नै ट्रम्पलाई पराजित गर्न सक्षम हुने विश्वास व्यक्त गरे । अत्यधिक पक्षधरताको आजको युगमा “बुटिगीगले अरुभन्दा केही राम्रो गरी उम्मेदवारबीच एकता कायम गर्न सक्ने” उनले बताए । सेवानिवृत्त शिक्षिका क्यारोल क्लार्कले आफूले वारेनको समर्थन गर्ने बताइन् । “पछिल्लो चुनावमा म हिलारी (क्लिन्टन) को समर्थक थिएँ । अहिले महिलाको समय हो, तपाइँ के भन्नुहुन्छ ?”