काठमाडौं । रसुवाको भोटेकोशी क्षेत्रमा आएको विनाशकारी बाढीपछि ठूलो मानवीय क्षति भएको छ । बाढीमा परी धेरै मानिस बेपत्ता भएका छन् भने कतिपयको मृत्यु भएको छ । बाढीका कारण धेरै परिवार घरबारविहीन छन् ।

बेपत्ता आफन्तको अवस्था पत्ता लगाउन परिवारका सदस्यहरू निरन्तर खोजीमा जुटिरहेका छन् ।

बाढीपछि बेपत्ता आफन्तको खोजीमा काठमाडौंको राष्ट्रिय ट्रमा सेन्टरमा आइपुगेकी धादिङ गंगाजमुना—४ की रमीता बस्नेत बाँनियाले बाढीपछि मानसरोवर यात्राका क्रममा ५४ जना सम्पर्कविहीन भएकामध्ये आफन्तहरु धेरै जना परेको सुनाइन ।

रमीताले सम्पर्कविहीनमध्ये उनका दाजु, अंकल, साथी र सानोबुवा पनि रहेको सुनाइन् । उनीहरू मानसरोवर ट्रेकिङका लागि ‘लाइफ होलिडे’मार्फत ५४ जनाको समूहमा रसुवा पुगेको बताइन् ।

उनले भनिन्, ‘मेरो दाइ, अंकल, अनि साथी अनि सानोबुवा हुनुहुन्छ । उहाँहरू टिमुरेमा बास बस्नुभएको अनि लाइफ होलिडेबाट उहाँहरू कैलाश यात्रा जानुभएको हो । ५४ जनाको ग्रुपमा नारायण बानियाँतर्फ २० जना हुनुहुन्थ्यो । अरू दाइहरूको आ—आफ्नै ग्रुप थियो । उहाँहरू बिहान साढे आठ बजेसम्म अफिसको सम्पर्कमा आउनुभएको थियो, त्यसपछि सम्पर्कमा हुनुहुन्न ।’

बाँनियाले विशेषगरी नारायण बानियाँको परिवारको अवस्था संवेदनशील रहेको भन्दै तत्काल खोजी तथा उद्धार कार्यलाई अझ तीव्र बनाउन आग्रह गरिन । बानियाँकी ६ वर्षीया छोरी र श्रीमती रहेको उनले बताइन् ।

उनले सम्पर्कविहीन व्यक्तिहरूलाई कसैले देखेको, भेटेको वा उनीहरूबारे कुनै जानकारी पाएको भए परिवारलाई खबर गर्न आग्रह गरिन् ।

यसैगरी, सिन्धुपाल्चोकको भोटेकोशी गाउँपालिका–१ साबुखानीका प्रकाश श्रेष्ठले आफ्ना दाइ रुद्रबहादुर श्रेष्ठ तीन–चार दिनदेखि सम्पर्कविहीन रहेकाले खोजीका लागि आएको बताए । रुद्रबहादुर यही १० गते रसुवा गएको उनले बताए ।

‘मेरो दाइ रुद्रबहादुर श्रेष्ठ हराउनुभएको छ । तीन–चार दिनदेखि सम्पर्क हुन सकेको छैन । यही १० गते रसुवा जानुभएको हो,’ प्रकाशले भने । रुद्रबहादुरको परिवारमा श्रीमती र दुई जना बालबालिका छन् ।

यस्तै, रसुवाको भोटेकोशी क्षेत्रमा आएको बाढीपछि सिन्धुपाल्चोक बलेफी गाउँपालिका–२ का विशाल नेपाली पनि सम्पर्कविहीन छन् । ट्रमा सेन्टरमा पुगेका सीताराम नेपालीले विशाल नेपाली सम्पर्कविहीन भएको जानकारी दिए ।

सीतारामका अनुसार विशाल भ्यान चालक हुन् । उनी भदौ ९ गते बेलुका रसुवा पुगेका थिए। भोलिपल्ट बिहान करिब ७ बजेसम्म परिवारसँग सम्पर्कमा रहेको भए पनि त्यसपछि बाढी आएसँगै उनको सम्पर्कमा नरहेको जानकारी दिए ।

उनले भने, ‘लासहरू थुप्रै हे¥यौँ, उद्धार गरेका क्षेत्रमा पनि हेर्यौं तर उहाँ भेटिनुभएन । अहिलेसम्म बेपत्ता हुनुहुन्छ ।’

उनले खोजीका क्रममा घाइतेहरू राखिएको स्थानदेखि शव भेटिएका ठाउँ र उद्धार गरिएका विभिन्न क्षेत्रमा पुगेर खोजी गरे पनि अहिलेसम्म उनको कुनै पत्तो लाग्न नसकेको बताए ।

विशालको करिब ६ महिनाअघि मात्रै विवाह भएको र परिवारमा उनकी श्रीमती रहेको सीतारामले जानकारी दिए ।

यस्तै, नुवाकोटको लिखु गाउँपालिका–४, चौघडाका सन्तोष राई आफ्ना भाइसहित पाँच जना बेपत्ता भएको बताए ।

राईका अनुसार उनका भाइ करिब ३१ वर्षका सञ्जीव राई विद्युतीय (ईभी) गाडी लिन टिम्बुरे भन्सार पुगेका थिए । उनी भदौ ९ गते साँझ करिब ७ बजे टिम्बुरे पुगेका थिए । त्यहाँ पुगेपछि खाना खाएर सुतेको जानकारी परिवारले पाएको थियो ।

भोलिपल्ट भदौ १० गते बिहान परिवारले फोन गरी उनीहरू कहिले फर्किने भनेर सोध्दा सञ्जीवले चिया खाइसकेको र खाना खाएर करिब ११ बजे हिँड्ने बताएका थिए ।

बिहान करिब साढे ८ बजेसम्म उनीसँग सम्पर्क भइरहेको थियो । त्यसपछि भने टिम्बुरे क्षेत्रमा भेल आएको र फोन सम्पर्क नभएको उनले बताए ।

सञ्जीवसहित सोही समूहका पाँच जना बेपत्ता छन्। उनीहरूमध्ये करणबहादुर दमाई, चित्र बुढाथोकी, अनिल तामाङ र सुमन कार्की रहेको राईले जानकारी दिए ।

सञ्जीव नयाँ ईभी गाडी काठमाडौं ल्याउने र शोरुममा राखेपछि पुनः टिम्बुरे जाने क्रममा थिए । सञ्जीवका ११ वर्षका छोरा छन् भने उनकी श्रीमती रोजगारीका सिलसिलामा दुबईमा रहेको उनले बताए ।

यसैगरी, नुवकोटका बासुदेव पाण्डले रसुवा धारापानी घर भएका बलराम लामिछाने र उनका भाइ कृष्ण लामिछाने बाढीमा परेर सम्पर्कविहीन भएको बताए ।

बाढीमा बेपत्ता भएका पाण्डले दुवै दाजुभाइ चीनबाट सामान ओसारपसार गर्ने चालकका रूपमा काम गर्दै आएको पाण्डले बताए ।

पाण्डेका अनुसार बलरामसँग घटनाको अघिल्लो रातसम्म परिवारको सम्पर्क भएको थियो । त्यसपछि सम्पर्क हुन नसकेपछि परिवारले घटनाबारे जानकारी खोज्न थालेको हो । समाचार अनुसार उनीहरू बाढीमा फसेको हुनसक्ने आशंका भएको पाण्डेले बताए ।

बलरामको परिवारमा श्रीमती, तीन छोरी र एक छोरा गरी पाँच जना छन् । उनका बुवासहित परिवारका दुई जना ज्येष्ठ सदस्यसमेत अशक्त अवस्थामा छन् । बलरामका बुवासमेत मानसिक स्वास्थ्यसम्बन्धी समस्याका कारण थप अशक्त अवस्थामा रहेको पाण्डेले जानकारी दिए ।

परिवारजनले रसुवा पुगेर समेत खोजीको प्रयास गरेका छन् । स्थानीय बाटो हुँदै रसुवा पुगे पनि बेपत्ता दाजुभाइबारे कुनै जानकारी प्राप्त नभएपछि उनीहरू काठमाडौं फर्किएको बताए ।

परिवारले अस्पताल तथा सम्भावित उद्धार केन्द्रमा समेत खोजी गरिरहेको जनाएको उनले बताए । ट्रमासँगै राजधानीका विभिन्न अस्पतालमा आफन्तको खोजीमा बाढी प्रभावितहरुको भीड देखिन्छ । वेपत्ताको खोजीका लागि नाम लेखाउनेहरुको पनि उत्तिकै लाइन देखिने गरेको छ ।