काठमाडौं। कोरोनाभाइरसको प्रकोप विश्वभर बढिरहेका बेलाइटलबाट केही राहतको खबर आएको छ । इटलीमा अहिलेसम्म कोरोनाभाइरसबाट ६ हजारभन्दा बढीको ज्यान गइसकेको छ । तर, पछिल्लो २ दिनमा मृत्यु हुनेको संख्या भने घट्दै गएको छ । यदि अझै थप केही दिन यही क्रम जारी रहेमा इटलीबाट प्रकोप घट्दै गएको विश्वास गर्न सकिनेछ ।

विश्वभरका १९५ देशमा कोरोना संक्रमण फैलिएको छ । अहिलेसम्म ३ लाख ८३ हजार ४४२ जना कोरोनाबाट संक्रमित भइसकेका छन् । यीमध्ये करिब १ लाख संक्रमित अस्पतालमा उपचारपछि ठिक भएर घर फर्किएका छन् । १६ हजार ५८५ जनाको मृत्यु भएको छ । इटलीमा मृत्यु हुनेको संख्या विश्वमै सबैभन्दा बढी छ । इटलीमा मृत्यु हुनेको संख्या चीनभन्दा दोब्बर पुग्न लागिसकेको छ ।

इटलीमा अहिलेसम्म कोरोनाबाट ६ हजार ७७ जनाको मृत्यु भइसकेको छ । समाचार एजेन्सी पीटीआइका अनुसार इटलीमा विगत २ दिनमा मृत्युको क्रम घटेको छ । शनिबार इटलीमा रेकर्ड ७९३ जनाको कोरोनाका कारण मृत्यु भएको थियो । यसले विश्वभरी त्रासको वातावरण सृजना गरेको थियो । तर, लगत्तै मृत्युको संख्या घट्दै गएको छ । आइतबार यहाँ मृत्यु हुनेको संख्या घटेर ६५१ भएको थियो चने सोमबार त्यसमा पनि घटेर ६०१ मा झरेको छ ।

यहाँ नयाँ संक्रमितको संख्या पनि क्रमशः घट्न थालेको छ । सोमबार यहाँ ४ हजार ७८९ नयाँ संक्रमित भेटिए । आइतबार भने ६ हजार ५५७ नयाँ संक्रमित थपिएका थिए । मिलानका एक बरिष्ठ मेडिकल अफिसर गियुलिनो गलेराले भने ‘हामी अहिले कोरोनामाथि जीतको घोषणा गर्न सक्दैनौं तर दुई दिनमा संक्रमण कम हुने संकेत देखिएका छन् ।’