काठमाडौं। अक्सफोर्ड विश्वविद्यालयले विकास गरेको कोरोनाभाइरसको भ्याक्सिन ७३ दिनमा बजारमा आउने दावीसहित प्रकाशित समाचारबारे यसको उत्पादन गर्ने कम्पनी सिरम इन्स्टिच्युटले प्रस्ट पारेको छ । भारतको पुणेस्थित सिरम इन्स्टिच्युटले अक्सफोर्डको भ्याक्सिन उत्पादन गर्नको लागि साझेदारी गरेको छ र उसलाई भारत सरकारले पनि भ्याक्स्नि उत्पादन गर्न अनुमति दिइसकेको छ । सिरम इन्स्टिच्युट उत्पादन परिमाणको आधारमा विश्वकै सबैभन्दा ठूो भ्याक्सिन उत्पादक हो ।

सिरमले ७३ दिनमा कम्पनीले भ्याक्सिन बजारमा ल्याउने दावीसहित प्रकाशित समाचारमा सत्यता नभएको जनाएको छ । सिरमले अक्सफोर्डको भ्याक्सिन कोभिशिल्ड नामबाट उत्पादन गर्दैछ । बिजनेस टुडेले आज कम्पनीले भ्याक्सिन २३ दिनमा व्यवसायिक रुपमा बजारमा ल्याउने दावीसहित समाचार प्रकाशित गरेको थियो । रिपोर्टमा भारत सरकारले नेशनल इम्युनाइजेशन प्रोग्राम अन्तर्गत कम्पनीबाट ७८ करोड डोज सुरक्षित गर्न लागेको र भारतीयहरुले यो भ्याक्सिन निःशुल्क पाउने पनि दावी गरिएको थियो ।

‘सेरम इन्स्टिच्युट अफ इण्डिया प्रस्ट पार्दछ कि कोभिशिल्डको उपलब्धताबारे हालै मिडियामा गरिएका दावीहरु पूर्ण रुपमा असत्य र अनुमानको भरमा गरिएका हुन्’ कम्पनीले भनेको छ ‘अहिले सरकारले हामीलाई भ्याक्सिन भविष्यमा उपयोग गर्ने गरी स्टकमा राख्नको लागि मात्रै उत्पादनको अनुमति दिएको छ ।’ कम्पनीले सिरम, एस्ट्राजेनेका र अक्सफोर्ड विश्वविद्यालयको सहकार्यमा विकास भइरहेको कोभिशिल्ड ट्रायलमा सफल भएको प्रमाणित भएपछि र नियामक निकायको स्वीकृति पाइसकेपछि मात्रै व्यवसायिक प्रयोगको लागि उपलब्ध हुने बताएको छ ।

‘अक्सफोर्ड–एस्ट्राजेनेकाको भ्याक्सिनको फेज ३ ट्रायल चलिरहेको छ । भ्याक्सिन सुरक्षित, रोग प्रतिरोधी र प्रभावकारी भएको प्रमाणित भएपछि सिरम इन्स्टिच्युट अफ इण्डियाले यसको उपलब्धताको आधिकारिक घोषणा गर्नेछ’ कम्पनीले भनेको छ । कम्पनीले भारत सरकारले भ्याक्सिनको डोज सुरक्षित गर्न लागेको दावीसहित आएको रिपोर्टबारे भने कुनै प्रतिक्रिया दिएको छैन ।