काठमाडौं। अमेरिकाका पूर्व राष्ट्रपति डोनाल्ड ट्रम्पलाई नै २०२४ को राष्ट्रपति निर्वाचनमा समेत उम्मेदवार बनाउने रिपब्लिकन पार्टीले तयारी गरिरहेका बेला प्रतिष्ठित अखबार वाल स्ट्रिट जर्नलले ट्रम्पले अर्को चुनाब नजित्ने भविष्यवाणी गरेको छ । अखबारले यदि ट्रम्प २०२४ मा राष्ट्रपतिको निर्वाचनमा उम्मेदवार भएमा यसले रिपब्लिकन पार्टीभित्र विभाजन ल्याउने र डेमोक्र्याटले जित्ने दावी गरेको छ ।

ट्रम्पले २०२० को निर्वाचनमा जो बाइडेनसँग हारे । अमेरिकाको संविधानअनुसार १ व्यक्ति २ पटक राष्ट्रपति बन्न पाउँछ । यस हिसाबले २०२२ मा पनि बाइडेन नै राष्ट्रपति पदको उम्मेदवार बन्ने अनुमान गर्न सकिन्छ । अमेरिकाको अढाइ शताब्दी लामो प्रजातान्त्रिक इतिहासमा सबैजसो राष्ट्रपतिहरु दोस्रो कार्यकालको लागि उम्मेदवार भएका छन् र तीमध्ये धेरैजसोले जितेका पनि छन् । केही सीमित व्यक्तिहरुले मात्रै दोस्रो कार्यकालको लागि चुनाब लड्दा हारेका छन् र ट्रम्प तिनै अपवादमध्येका १ हुन् ।

२०२४ मा बाइडेन नै उम्मेदवार बन्लान् भन्ने अनुमान गरिँदै गर्दा अर्कोतर्फ उनको उमेर पनि ध्यान दिनुपर्ने विषय बनेको छ । बाइडेन अमेरिकी इतिहासमै अहिलेसम्मका सबैभन्दा पाका राष्ट्रपति हुन् र २०२४ मा बाइडेन ८१ वर्षका हुनेछन् । यस्तो अवस्थामा २०२२ मा डेमोक्र्याटको तर्फबाट उपराष्ट्रपति कमला ह्यारिस वा अन्य कोही उम्मेदवार हुन सक्ने र त्यो अवस्थामा ट्रम्पले जित्न सक्ने रिपब्लिकनहरुले अपेक्षा गरेका छन् । तर, पछिल्लो विश्लेषणले रिपब्लिकनलाई धक्का लागेको छ ।

द गार्डियनका अनुसार करिब आधा रिपवब्लिकनहरु ट्रम्प नै पार्टीको प्रमुख रहुन् भन्ने चाहन्छन् । यसको अर्थ आधा अमेरिकी मतदाताहरु ट्रम्प राजनीतिबाट बाहिरिउन् भन्ने चाहन्छन् । अर्कोतर्फ हजारौं रिपब्लिकनहरुले ६ जनवरीको क्यापिटल हिल आक्रमणपछि पार्टी छाडेका छन् । शनिबार ७ रिपब्लिकन सिनेट सदस्यले ट्रम्पको विपक्षमा मतदान गरे । यो विभाजन उल्लेख्य हो र अविश्वासको प्रस्तावमा मतदानमा कुनै राष्ट्रपतिलाई आफ्नै पार्टीका सिनेटरले धोका दिएको सबैभन्दा ठूलो संख्या हो ।