काठमाडौं । ]पाकिस्तानमा दुर्घटनावश भारतको मिसाइल प्रहार भएको केही दिनपछि फिलिपिन्सले भारतसँग जवाफ मागेको थियो। अङ्ग्रेजी पत्रिका ‘द इन्डियन एक्सप्रेस’ले आफ्नो रिपोर्टमा लेखेको छ, ‘फिलिपिन्सले भारतबाट ब्रह्मोस मिसाइल किनिरहेको कारणले यो स्पष्टीकरण मागेको हो ।’

अखबारका अनुसार राष्ट्रपति रोड्रिगो डुटेर्टेको मन्त्रिपरिषद्को सबैभन्दा वरिष्ठ मन्त्री तथा रक्षा सचिव डेल्फिन लोरेन्जाना ले भारतीय राजदुत शम्भु एस कुमारनलाई बोलाएका थिए । कुमारनले लोरेन्जानालाई मिसाइल प्रणालीमा कुनै प्राविधिक समस्या नभएको र “अनुसन्धान जारी रहेको” बताए। उनले अनुसन्धान पूरा भएपछि त्यसको जानकारी सम्बन्धित निकायलाई पनि दिने बताए ।

आकस्मिक रूपमा पाकिस्तानतर्फ प्रहार गरिएको क्षेप्यास्त्र ब्राह्मोस भएको भनिएको छ तर यसबारे अहिलेसम्म कुनै आधिकारिक बयान आएको छैन । जसका कारण मनिला पनि चिन्तित बनेको छ ।

यस वर्ष जनवरी २८ मा, फिलिपिन्सले ब्रह्मोस मिसाइलको तीन ब्याट्रीहरूको लागि भारतसँग सम्झौतामा हस्ताक्षर गर्‍यो, जुन डिफेन्स रिसर्च एण्ड डेभलपमेन्ट अर्गनाइजेसन (DRDO) र रसियाको NPO Mashinostroynia ले संयुक्त रूपमा उत्पादन गरिरहेको छ।

फिलिपिन्ससँग ३७५ मिलियन डलरको सम्झौता भएको छ, जुन भारतको प्रमुख रक्षा निर्यात भएको बताइएको छ ।

मंगलबार अनन्थ सेन्टरमा आयोजित एक कार्यक्रममा बोल्दै कुमारनले भने, “म यसलाई चिन्ता होइन जिज्ञासा भन्न चाहन्छु। मैले रक्षा सचिवसँग कुराकानी गरेको थिएँ र उनलाई कुनै प्राविधिक समस्या नभएको र अनुसन्धान भइरहेको बताएको छु।”

उक्त घटनाको एक दिनपछि मार्च १० मा पाकिस्तानी सेनाले हतियारविहीन भारतीय सुपरसोनिक मिसाइल सिरसाबाट उडेको र खानीवाल जिल्लाको मियाँ चान्नुमा खसेको बताएको थियो। यो ठाउँ पाकिस्तानसँग भारतीय सीमाबाट १२४ किलोमिटर टाढा थियो।

मार्च ११ मा, रक्षा मन्त्रालयले एक विज्ञप्ति जारी गर्दै यो एक आकस्मिक फायर भएको र यो नियमित मर्मतसम्भारको क्रममा भएको बताएको थियो।