काठमाडौं । गर्भपतनको अधिकारलाई कायम राख्न अमेरिकाका धेरै शहरहरूमा शनिबार ठूला प्रदर्शनहरू भएका छन्। गर्भपतन अधिकार अधिवक्ताहरू आगामी केही हप्तामा आउन सक्ने सर्वोच्च अदालतको आगामी निर्णयको विरोधमा आफ्नो ऐक्यबद्धता देखाउन भेला भए।

पीटीआईका अनुसार शिकागो, एटलान्टा, ह्युस्टन र अन्य शहरहरूमा शनिबारको र्‍यालीमा सहभागी भएका मानिसहरूले यो अधिकारलाई कानुनी रूपमा कायम राख्न संघर्ष गर्ने दृढता व्यक्त गरे।

यो साता सर्वोच्च अदालतको राय चुहावटका कारण यी विरोध प्रदर्शन भइरहेका छन् । पोलिटिको नामक वेबसाइटले सर्वोच्च अदालतले सन् १९७३ को ‘रो भर्स वेड’ मा दिएको फैसला उल्टाउन सुझाव दिएको जनाएको छ ।

तर, यो एक लीक राय मात्र हो, जबकि अदालतको अन्तिम निर्णय आउन बाँकी छ। यदि सर्वोच्च अदालतले आफ्नो ५० वर्ष पुरानो फैसला उल्टायो भने राज्यहरूले चाहेमा गर्भपतनमा प्रतिबन्ध लगाउन सक्नेछन्।

तर महिला अधिकारका लागि काम गर्ने महिला र स्वयम् महिलाहरु सर्वोच्च अदालतको कथित राय सार्वजनिक भएपछि विरोधमा उत्रिएका छन् । महिलाले सन्तान जन्माउन चाहेको बेला स्वतन्त्रता हुनुपर्छ भन्ने उनीहरुको भनाइ छ ।