काठमाडौं । अमेरिकाको ओक्लाहोमा अस्पतालमा बुधबार भएको गोलीकाण्डमा नयाँ खुलासा भएको छ । आरोपितले ढाड दुखेको भन्दै अस्पतालमा उपचार गराएका थिए । उपचारपछि पनि ढाड दुख्ने समस्यामा सुधार नभएपछि उनले अस्पतालमा आक्रमण गरेका हुन् ।

४५ वर्षीय अभियुक्त माइकल लुइसले अस्पतालमा आक्रमण गरेपछि डा. प्रेस्टन फिलिप्स र अन्य तीन व्यक्तिलाई गोली हानी हत्या गरे र त्यसपछि आफैले आत्महत्या गरे।

लुइसले बारम्बार पीडाको गुनासो गर्दै क्लिनिकमा फोन गरिरहेको प्रहरीले जनाएको छ। त्यसपछि उनी ओक्लाहोमा अस्पतालको मेडिकल अफिसमा पुगेर शल्यक्रिया गर्ने डाक्टरलाई गोली हानेर हत्या गरेका थिए ।

तुल्साका प्रहरी प्रमुख फ्र्याङ्कलिनले लुइस मेरुदण्डको शल्यक्रियाका लागि अर्थोपेडिक सर्जन फिलिप्सकहाँ आएको बताए। फिलिप्सले मे १९ मा लुइसको शल्यक्रिया गरे र मे २४ मा अस्पतालबाट डिस्चार्ज भए।

उनले भने कि अस्पतालबाट डिस्चार्ज भएपछि लुइसले डा. फिलिप्सको कार्यालयमा धेरै पटक फोन गरे र आफू अझै पीडामा रहेको बताए। यसपछि मंगलबार फिलिप्सले लुइसको ढाडको दुखाइको जाँच गरी घर पठाए । यसपछि बुधवार लुइसले फेरि डा. फिलिप्सको अफिसमा फोन गरेर आफू अझै पीडामा रहेको बताए ।

२०१९ अमेरिकन एकेडेमी अफ पेन मेडिसिनको बैठकमा, दुई तिहाइ भन्दा बढी दुखाइ विशेषज्ञहरूले भने कि बिरामीले उनीहरूलाई वर्षमा कम्तिमा एक पटक शारीरिक हानिको धम्की दिए। एकेडेमीका पूर्व अध्यक्ष तथा मेयो क्लिनिकका प्राध्यापक डा. माइकल हुटेनले भने, ‘यस्ता घटना घटेपछि मात्रै थाहा हुन्छ ।’