काठमाडौं । अस्ट्रेलियामा भएको टी–२० विश्वकपको फाइनलमा पुग्न असफल भएको भारतीय टोलीको प्रदर्शनको दोष चयन समितिमा परेको छ । बीसीसीआईले शुक्रबार चेतन शर्माको अध्यक्षतामा रहेको चार सदस्यीय वरिष्ठ राष्ट्रिय चयन समितिलाई विघटन गरेको छ ।

समाचार एजेन्सी पीटीआईको रिपोर्ट अनुसार चेतन शर्माको कार्यकालमा भारत २०२१ को टी–२० विश्वकपको नकआउट चरणमा समेत पुग्न असफल भएको थियो र विश्व टेस्ट च्याम्पियनसिपको फाइनलमा पनि टोली असफल भएको थियो ।

चेतन शर्मा (उत्तर जोन), हरविन्दर सिंह (मध्य जोन), सुनील जोशी (दक्षिण जोन) र देवाशिष मोहन्ती (पूर्व जोन) ले हालैका समयमा वरिष्ठ राष्ट्रिय चयन समितिमा सबैभन्दा छोटो कार्यकाल पाएका छन्।

यीमध्ये केही २०२० र केही २०२१ मा चयन समितिमा आएका थिए। वरिष्ठ राष्ट्रिय चयनकर्ताहरू सामान्यतया चार वर्षका लागि नियुक्त हुन्छन् र उनीहरूको कार्यकाल पनि थपिएको छ।

शुक्रबार, बीसीसीआईले राष्ट्रिय चयनकर्ता (वरिष्ठ पुरुष) को लागी आवेदन आमन्त्रित गरेको छ। आवेदन पेश गर्ने अन्तिम मिति नोभेम्बर २८ हो।