काठमाडौं । बेलायत, जापान र इटालीले नयाँ पुस्ताको लडाकु विमान निर्माण गर्न हात मिलाउँदै आएको र आगामी दिनमा अमेरिका जस्ता सहयोगी देशहरू पनि सामेल हुने बताएका छन् ।

बेलायती प्रधानमन्त्री ऋषि सुनकले छिट्टै यसको घोषणा गर्न सक्नेछन् ।

यो नयाँ लडाकु विमान सन् २०३० को मध्यसम्ममा तयार हुनेछ र यसमा हावामा लड्न सक्ने क्षमता समावेश हुनेछ । यसका साथै यो विमान शत्रुको नजरबाट पनि बच्न सक्नेछ ।

यसमा अत्याधुनिक सेन्सरसहित आर्टिफिसियल इन्टेलिजेन्सको प्रयोग गरिने छ, जसले आवश्यक परे पाइलटलाई सहयोग गर्नेछ । यो विमानले बिस्तारै टाइफुन जेटलाई प्रतिस्थापन गर्नेछ।

यदि आवश्यक भएमा, यो लडाकु विमान पाइलट बिना उडान गर्न सक्षम हुनेछ र हाइपरसोनिक मिसाइलहरू प्रहार गर्न सक्षम हुनेछ।

यस्तो विमान बनाउने काम निकै महँगो साबित हुन सक्छ र अमेरिकी पेन्टागनको एफ–३५ विमान बनाउने परियोजना अहिलेसम्मकै सबैभन्दा महँगो परियोजना हो । यस कारणले गर्दा बेलायतले यो विमानका लागि सहयोगीहरूको खोजी गरिरहेको छ।

इटालीसँग पहिले नै सहमति भइसकेको थियो । अब यस मामिलामा जापानसँग मिलेर आउनुलाई ठूलो कदमका रूपमा लिइएको छ किनभने इन्डो–प्यासिफिकमा चीनको बढ्दो महत्वाकांक्षालाई ध्यानमा राख्दै जापान पश्चिमी मुलुकका लागि महत्वपूर्ण सहयोगी बनेको छ ।

अमेरिका यस्तो लडाकु विमान बनाउन लागेको छ । जर्मनी, स्पेन र फ्रान्स पनि यस्तो छुट्टै परियोजनामा ​​काम गरिरहेका छन्।

बेलायतका लागि यो सम्झौता सुरक्षाको मात्र नभई आर्थिक दृष्टिकोणले पनि महत्वपूर्ण छ । यसबाट देशमा हजारौं नयाँ रोजगारी सृजना हुने र हतियार निर्यातको बाटो पनि खुल्ने उसको विश्वास छ ।