काठमाडौं । चिलीका अधिकारीहरूले देशको उत्तरमा रहेको लास्कर ज्वालामुखी सक्रिय भएको र करिब छ किलोमिटर (छ हजार मिटर) उचाइमा धुवाँ निस्किरहेको चेतावनी दिएका छन्। शनिबार हल्का भूकम्पपछि एन्डिज पहाडी क्षेत्रमा रहेको यो ज्वालामुखी सक्रिय भएको छ ।

यस सम्बन्धमा अधिकारीहरूले चेतावनीको स्तर बढाएका छन्। राष्ट्रिय भूविज्ञान र खानी सेवाका अनुसार यो ज्वालामुखी ‘अस्थिर’ बनेको छ र अधिकारीहरूले यसबाट निस्कने विष्फोट र धुवाँको निरन्तर निगरानी गरिरहेका छन् ।

लस्कर ज्वालामुखीबाट तातो ग्यास र खरानीको धुवाँ निस्कने क्रम जारी छ। यद्यपी यसका कारण आसपासका क्षेत्रमा अहिलेसम्म कुनै क्षतिको खबर नआएको अधिकारीहरुले बताएका छन् ।

अधिकारीहरूले ज्वालामुखी वरपरको पाँच किलोमिटरको दायरालाई प्रवेश निषेधित क्षेत्र घोषणा गरेका छन्।

देशको उत्तरमा अवस्थित लस्कर विश्वको सबैभन्दा सुख्खा ठाउँ अटाकामा मरुभूमिबाट करिब ७० किलोमिटर टाढा छ।